Gregorius episcopus seruus seruorum dei dilectis filiis abbati sancte Marie de Wienna ejusque fratribus tam presentibus quam futuris regularem uitam professis in perpetuum. Religiosam uitam eligentibus apostolicum convenit adesse presidium, ne forte cuiuslibet temeritatis incursus aut eos a proposito reuocet aut robur, quod absit, sacre religionis infringat. Eapropter dilecti in domino filii uestris iustis postulationibus clementer annuimus, et monasterium sancte Marie de Wienna, in quo diuino estis obsequio mancipati, sub beati Petri et nostra protectione suscipimus et presentis scripti priuilegio communimus. Inprimis siquidem statuentes, ut ordomonasticus, qui secundum deum et beati Benedicti regulam in eodem monasterio institutus esse dinoscitur, perpetuis ibidem temporibus inuiolabiliter obseruetur. Preterea quascunque possessiones, quecunque bona dictum monaste-rium inpresentiarum iuste ac canonice possidet aut in futurum concessione pontificum, largitione regum vel principum, oblatione fidelium seu aliis iustis modis prestante domino poterit adipisci, firma uobis uestrisque successoribus et illibata permaneant. In quibus hec propriis duximus exprimenda vocabulis. Locum ipsum, in quo prefatum monasterium situm est, cum omnibus pertinentibus suis, ecclesiam de Bulcha cum parrochia et omnibus pertinentiis suis et in eadem parrochia tertiam partem omnium decimarum cum una curte, manso et quinque vineis; ecclesiam de Ecchendorf cum parrochia et omnibus decimis et aliis pertinentiis suis; ecclesiam de Celdondorf cum parrochia et omnibus pertinentiis suis; in Ensesdorf curtem cum duobus mansis et dimidio et omnibus possessionibus et aliis pertinentiis suis. In Wienna sancti Petri, sancte Marie super ripam et saneti Rudoberti infra muros ejusdem loci capellas cum omnibus pertinentiis earundem. Ecclesiam de Ensesdorf cum parrochia et omnibus aliis pertinentiis suis. Decimam totius coquine ducis Austrie, quando in expensis propriis est in Austria. Capellam sancte crucis in Dulna iuxta ripam Danubii sitam cum pertinentiis suis. Capellam sancti Colmanni cum omnibus pertinentiis suis, cum pratis, uineis, terris, nemoribus, usuagiis et pascuis, in bosco et plano, in aquis et molendinis, in uiis et semitis, et omnibus aliis libertatibus et immunitatibus suis. Sane noualium uestrorum, que propriis manibus aut sumptibus colitis, siue de uestrorum animalium nutrimentis nullus a uobis decimas extorquere uel exigere presumat. Liceat quoque uobis clericos uel laicos liberos et absolutes e seculo fugientes ad conuersionem recipere ac eos absque contradictione aliqua retinere. Prohibemus insuper, ut nulli fratrum uestrorum post factam in monasterio uestro professionem fas sit, sine Abbaus sui licentia, nisi artioris religionis obtentu, de eodem loco discedere. Discedentem uero absque communium litterarum uestrarum cautione nullus audeat retinere. Cum autem generale interdictum terre fuerit, liceat uobis clausis ianuis, exclusis excommunicatis et interdictis, non pulsatis campanis, suppressa uoce diuina officia celebrare. Crisma uero, oleum sanctum, consecrationes altarium seu basilicarum et ordinationes clericorum, qui ad sacros ordines fuerint promouendi, uobis a diocesano episcopo sine prauitate uolumus exhiberi. Prohibemus insuper, ut nulli liceat ecclesie uestre nouas et indebitas exactiones imponere, uel in nos aut ecclesiam uestram sine manifesta et rationabili causa excommunicationis vel interdicti sententiam promulgare. Sepulturam quoque ipsius loci liberam esse decernimus, ut eorum deuotioni et extreme uoluntati, qui se illic sepeliri deliberauerint, nisi forte excommunicati vel interdicti sint, nullus obsistat, salua tamen iustitia illarum ecelesiarum, a quibus mortuorum corpora assumuntur. Obeunte uero te, nunc eiusdem loci abbate, uel tuorum quolibet successorum nullus ibi qualibet surreptionis astutia seu uiolentia preponatur, nisi quem fratres communi consensu uel fratrum pars consilii sanioris secundum deum et beati Benedicti regulam prouiderint eligendum. Decernimus ergo, ut nulli omnino hominum liceat predictum monasterium temere perturbare aut eius possessiones auferre uel ablatas retinere, minuere seu quibuslibet uexationibus fatigare, sed omnia integra conseruentur eorum, pro quorum gubernatione ac sustentatione concessa sunt, usibus omnimodis profutura, salua sedis apostolice auctoritate et diocesani episcopi canonica iustitia et super predietis decimis moderatione concilii generalis. Si qua igitur in futurum ecclesiastica secularisue persona hanc nostre constitationis paginam sciens contra eam temere uenire temptauerit, secundo tertioue commonita, nisi reatum suum congrua satisfactione correxerit, potestatis honorisque sui dignitate careat reamque se diuino iudicio existere de perpetrata iniquitate cognoscat et a sacratissimo corpore ac sanguine dei et domini redemptoris nostri Iesu Christi aliena fiat atque in extremo examine districte subiaceat ultioni. Cunctis autem eidem loco sua iura seruantibus sit pax domini nostri Jesu Christi, quatinus et hic fructum bone actionis percipiant et apud districtum iudicem premia eterne pacis inueniant. Amen. Amen. Amen. Ego Stephanus basilice duodecim apostolorum pbr. card. Ego Gregorius catholice ecclesie episcopus. Ego Thomas tt. sce. Sabine pbr. card. Ego Pelagius Albanensis eps. Ego Guido Prenestinus eps. Ego Oliuerus Sabinensis eps. Ego Octauianus scor. Sergii et Bachi diac. card. Ego Rainerius sce. Marie in Cosmidin diaconis cardinalis. Ego Stephanus sci. Adriani diacon. card. Datum Anagnie per manum magistri Sinibaldi sancte Romane ecclesie vicecancellarii v. idus Aug. Indict. xv. Incarnationis dominice anno M^o CC^o XXVII^o. Pontificatus uero domni Gregorii pp. viiij anno primo.

Source Fulltext: HAUSWIRTH, Schotten (=FRA II/18, 1859) S. 28-31