Gregorius episcopus seruus seruorum dei dilectis filiis . . abbati et conuentui monasterii sancte Marie Scottorum in Wienna ordinis sancti Benedicti Patauiensis diocesis salutem et apostolicam benedictionem. Cum a nobis petitur, quod iustum sit et honestum, tam uigor equitatis quam ordo exigit rationis, ut id per sollicitudinem officii nostri ad debitum perducatur effectum. Eapropter dilecti in domino filii iustis uestris postulationibus grato concurrentes assensu, ecclesiam de Pulka, cuius jus patronatus ad uos asseritis pertinere, quam venerabilis frater noster . . Patauiensis episcopus loci diocesanus, prout pertinebat ad eum, capituli sui accedente consensu, monasterio uestro in usus proprios retinendam pia et prouida liberalitate concessit, sicut in litteris eiusdem episcopi confectis exinde dicitur plenius contineri, prout eam iuste ac pacifice possidetis, uobis et eidem monasterio per uos auctoritate apostolica confirmamus et presentis scripti patrocinio communimus, ita tamen, quod perpetuo vicario, qui pro tempore seruiet in eadem, ad sustentationem suam et subeunda episcopalia et alia onera eiusdem ecclesie congrua portio de ipsius prouentibus assignetur. Nulli ergo omnino hominum liceat hanc paginam nostre eonfirmationis infringere uel ei ausu temerario contraire. Si quis autem hoc attemptare presumpserit, indignationem omnipotentis dei et beatorum Petri et Pauli apostolorum eius se nouerit incursurum. Dat. Laterani V. idus Decembris, pontificatus nostri anno duodecimo.

Source Fulltext: HAUSWIRTH, Schotten (=FRA II/18, 1859) S. 37-38