Ut rerum in preterito gestarum noticia liquere possit posteris in futuro, placuit ab antiquo maturitati sapientum, huiusmodi litterarum et testium memorie commendari. Nos igitur Jacobus dictus de Hoya, ciuis Wiennensis, rector officiorum per Austriam, vna cum vxore nostra Gertrude tenore presencium constare cupimus vniuersis, quod consedentes in domo nostra in loco familiari de salute anime meditantes ex quadam deuocione diuinitus inspirata redditus duodecim talentorum, trium solidorum cum viginti denariis, sitos circa cimiterium sancti Petri in Wienna et alibi vbicumque, velud in instrumento super hoc confecto specificati plenius continentur, quos tytulo proprietatis dandos vel ordinandos ad nostre arbitrium voluntatis comparaueramus apud dominum Willehelmum venerabtlem abbatem et conventum sancte Marie Scotorum in Wienna de licencia et consensu reuerendi patris et domini Wernhardi, venerabilis episcopi Patauiensis, quodam graui necessitatis artyculo eorundem Scotorum ecclesie inminente, sani mente et corpore restituendos decreuimus et ex nunc restituimus tali forma et modo, ut post curricula vite nostre ad vtilitatem ipsius monasterii et seruicium dei cum omnibus suis attinenciis, quemadmodum eos possedimus, absolute et libere reuertantur, reddentes eis ex nunc priuilegium super hoc confectum, ad maiorem euidenciam et cautelam volentes attencius et petentes, vt idem instrumentum vna cum presenti ad efficaciam animarum nostrarum inuiolatum et incorruptibile conseruetur, non obstante ordinatione quadam siue testamento, quod quodam tempore precedente quadam egritudine inpellente feceramus, quam uel quod non solum omnimodis inmutatum, verum eciam cassum et irritum nunciamus. Hac protestatione freti volumus, ut presens facta conditio testamenti inmobilis perpetuo perseueret, renunciantes ex nunc auctoritate iuris, que dicit, voluntas testatoris est deambulatoria quoad uiuit, sed hac auctoritate vti volumus, quod testamentum hominis inmobile perseueret, quod per testatoris obitum confirmatur. Preterea profitemur, nos alibi, in Lubiis videlicet in Wienna, decem et octo librarum redditus possidere, emptos tantummodo pro nostrarum beneficio personarum, qui similiter post tempora vite nostre ipso iure redire ad utilitatem dicti cenobii quouis semoto dubio tenebuntur, prout in instrumento super hoc dato specialiter est expressum. Insuper ex gratia speciali decimam in Chomanstorf, ad eos et eorum ecclesiam pertinentem, saluis minutis decimis nobis liberaliter contulerunt possidendam, vt supra, tempore vite nostre dono gratuite pietatis, que vna cum aliis supratactis omnibus ad dicti cenobii usus sine mora et inpedimento quolibet reducentur. In cuius rei testimonium et cautelam presentes eis assignauimus litteras, predicti venerabilis episcopi Patauiensis et nostro et aliorum amicorum nostrorum munimine roboratas, cum testibus subnotatis videlicet, dominus Wernhardus de sancto Nycolao, dominus Fridericus de Gvmpendorf sacerdotes, dominus Rimboto Zehlevp, dominus Chvnradus ivdex Wiennensis, Pilgrimus et Georius fratres dicti Chriglarii et plures alii fide digni. Datum et actum Wienne anno domini millesimo ducentesimo octuagesimo nono in festo beati Georii.

Source Fulltext: HAUSWIRTH, Schotten (=FRA II/18, 1859) S. 82-83