Ich Reinprecht der Thuers von Liechtinvels vergich an diesem prief vnd tven chund allen den, die nv lehen vnd hernach chunftig sint, di disen prief lesent oder ho^erent lesent, daz ich vnd mein vetter her Havg der Thvers von Liechtinvels mit Gotfrides gvnstvon Ekendorf vnd mit seim gvetin willen zder czeit, do wier is wol tven machten, verwechsilt vnd verpverchrecht haben vnd gegeben haben Seyfriden dem Pfiarrer von Eckendorf vnd seim gotshavs ewiclichen ze behalten ze rechten pverchrecht den pavmgarten der hinter Gotfrides Hofe leit ze Eckindorf, den er von uns zv lehen hat, vmme sechtzig phenning geltis rechtis aigens zv Wolbmansdorf auf zwain lehen, di der vorgenant Gotfrid inne schol haben aigentlichen vnd vnme dreizich phenning dienst, di der vorgenant pfarrer her Seyfried oder swer pfarrer zv Eckendorf ist dienen schol in den vargenanten hof alle iar an sant Georgin tag. Darvbir gib ich disen prief ze einem vrchvnde vnd zv einem offen zevge diser sache, vnd sint auch des gezevg, her Haug der Thvers von Liechtinvels, her Pilgreim von Puechaim, Havg hern Haugen svn des Thversin vnd ander erber levt genveg. Diser prief ist gegeben, do von Cristes gebvrt dergangen warn drevczen hundert iar darnach in dem dritten iar, an sant Georgin tag.

Source Fulltext: HAUSWIRTH, Schotten (=FRA II/18, 1859) S. 111-112