Ich Wolfger der Stolberger von Judenowe vnd mein Hovsvrowe ver Otilie wir veriehen vnd tvn chvnt allen den, die disen prief lesent, horent oder sehent, die nv lebent vnd hernach chvnftich sint, daz wir mit bedahtem muet, mit zeitigem rat vnserr vreunt, mit willen vnd gvnst aller vnserr geerben vnd mit gesamter hant, ze der zeit, do wir ez wol getuen mohten, haben verchauffet vnsers rehten vnd vreien aigens ein Hofstat, di wir ze Veltz gehabt haben, davon man vns dienet alle Iar zwen vnd Sibentzich phenning, vnd die hab wir gegeben dem Erbern herren Apt Nichlasen von den Schotten ze Wienne vnd sinem Goteshovse mit allem dem rehten, vnd wir si emalen gehabt haben, ledichlichen vnd vreilichen ze haben vnd allen sinem vrvmen damit ze schaffen, swie im liep ist. Vnd durch bezzer sicherhait, so hab wir dem vorgenanten herren Apt Nichlasen vnd sinem Goteshause darvber rehten scherm gelubt für alle ansprach, baide wir vnd alle vnser geerben, als aigens reht ist in dem Lande ze Osterreich, vmb sehtzich vnd sehs phvnt wienner phenning, der wir reht vnd redelich verihtet sein, vnd darvmbe, daz daz alles also staet vnd vnzerbrochen beleiben, des gib ich vorgenanter Wolfger der Stolberger vnd mein Havsvrowe ver Otilie dem oftgenanten herren apt Nichlasen vnd sinem Goteshavse disen prief ze einer ewigen bestaetigunge diser sache versigelten mit minem Insigel. Vnd sint ouch des gezevge die erbern leute her Chvnrat der Mvnch von Tuln, her Wolfhart der Lachsendorfer, der Ott des Hevnlein Svn, Gerwich, Bitterolf in der wiennerstrazze vnd ander frvm leut genuech. Diser prief ist gegeben, do von Christes gepurt waren ergangen Tausent Iar Drev hvndert Iar vnd darnach in dem zehenten Iare, an sand Nichlas tage.

Source Fulltext: HAUSWIRTH, Schotten (=FRA II/18, 1859) S. 137