Johannes episcopus seruus seruorum dei dilecto filio . . preposito Nevburgensis ecclesie Patauiensis dyocesis salutem et apostolicam benedictionem. Significarunt nobis dilecti filii . . abbas et conuentus monasterii Scotorum in Wienna ordinis sancti Benedicti Pat. dyoc., quod nonnulli iniquitatis filii, quos prorsus Ignorant, decimas, census, redditus, legata, terras, domos, possessiones, ortos, pascua, prata, nemora, instrumenta publica et quedam alia bona, ad monasterium ipsum spectantia, temere ac maliciose ocultare et oculte detinere presumunt, non curantes, ea ipsis abbati et conuentui exhibere in animarum suarum periculum (et) dictorum abbatis et conuentus ac monasterii non modicum detrimentum, super quo idem abbas et conuentus apostolice sedis remedium inplorarunt. Quocirca discrecioni tue per apostolica scripta mandamus, quatenus omnes huiusmodi ocultos de tentores decimarum, censuum, reddituum et aliorum bonorum predictorum ex parte nostra publice in ecclesiis coram populo per te vel alium moneas, ut infra competentem terminum, quem eis prefixeris, ea dictis abbati et conuentui a se debita restituant et reuelent ac de ipsis plenam et debitam satisfactionem impendant, et si id non impleuerint, infra alium terminum competentem, quem eis ad hoc peremptorie duxeris prefigendum, ex tunc in eos generalem excomunicacionis sentenciam proferas, faciens eam, ubi et quando expedire uideris, usque ad satisfactionem condignam sollempniter publicari. - Datum Auinione nonis Octobris pontificatus nostri anno tercio.

Source Fulltext: HAUSWIRTH, Schotten (=FRA II/18, 1859) S. 165