Nos Chunradus dei gratia abbas, Rued. prior totusque Conuentus monasterii sancti Petri Salczburge presentibus profitemur et scire cupimus vniuersos, quod reuerendo in Christo patri ac domino domino Nicolao venerabili abbati totique conuentui ecclesie sancte Marie Scotorum in Wienna plenum confraternitatis nostre consortium sibi et suo venerando collegio in hiis scriptis offerimus et inuiolabiliter et obseruandum in perpetuum confirmamus. Cuius quidem communicationis suffragiorum et bonorum articuli declarantur tali scripto, quod statim, vt alicuius ipsorum confratrum obitus nobis certius fuerit intimatus, pronunciato die proxime succedente vigilias et missam defunctorum cum nota et compulsacione sollempni faciamus decantari. Et nichilominus omnium missarum, oracionum, predicacionum, ieiuniorum, abstinenciarum, vigiliarum, laborum ceterorumque bonorum, que per fratres nostri monasterii antedicti et per vniuersos generalem seu specialem confraternitatem nobiscum habentes operari dignabitur saluatoris clemencia, participacionem ipsis tenore presencium concedimus in vita pariter et in morte. In cuius confraternitatis testimonium ipsis has tradimus litteras sigillorum nostrorum appensione communitas. Datum Salczburge in vigilia ascensionis domini. Anno domini millesimo trecentesimo quadragesimo quarto.

Source Fulltext: HAUSWIRTH, Schotten (=FRA II/18, 1859) S. 248-249