Ich Fridreich der Helffant vnd ich Vrsel sein Hausvrowe wir vergehen vnd tuen chunt allen den, die disen brief lesent oder hoerent lesen, daz wir vnd vnser Erben vnuerschaidenleich gelten suln meinem Prueder Jansen dem Helffant vnd seinen erben sicben phunt Wienner phenning, vnd haben in dafur gesatzt ze rechter Satzung nach dez Landes recht ze Osterreich mit vnser Erben guten willen vnd gunst, mit verdachtem mu^ot vnd mit gesampter hant, zu der zeit, do wir iz wol getun mochten, vnd mit vnsers Lehenherren Hant, des Erbern Herren Hern Nychlas von Cheyawe, vnsers rechten Lehens, daz wir von im ze Lehen haben, ayn Phunt phenninge vnd zwelif phenning Wienner mu^enzze geltes, die da ligent datz dem Helffants auf einem gantzen lehen vnd auf einer Hofstat vnd auf alle deu, vnd darzu geho^eret, ze velde vnd ze dorffe, ez sei gestift oder vngestift, versu^echt oder vnuersu^echt, swie so daz genant ist, also mit ausgenomener rede, alle die weil wir si der vorgenanten ir phenning nicht richten vnd wem, so suln si die egenanten gu^elt in nutz vnd in gewer inne haben vnd innemen vnd vezzen ze geleicher weis, alz wir selber, an allen abslag, alz Satzung recht ist vnd dez Landez recht ze Osterreich. Vnd suln auch wir vnd vnser erben die vorgenanten Gu^elt von in lo^esen von sant Jo^erigen tag, der schierist chu^emt v^eber ein iar, vmb siben phunt Wienner phenning an allen chrieg vnd an alle Widerrede. Ist aber, daz wir dieselben gu^elt von in nicht wider lo^esen von sant Jo^erigen tag, der schierist chu^emt, v^eber ein iar, so suln wir denne paidenthalben vnser freunt zwen nemen, wir ainen an vnserm tail, vnd si ainen an irm tail, vnd swaz die bei irn trewen gesprechen mu^egen, daz si vns herzu suln geben, daz suln wir von in nemen an alle widerrede, vnd sol auch denne die oftgenant gu^elt darumb ir rechts chaufgu^et sein, daz si denne damit suln fu^erbaz ledichleich vnd vreyleich allen irn frumen schaffen, verchauffen, versetzen vnd geben, swem si wellen, an allen irresal. Vnd sein auch wir, ich Fridreich der Helffant vnd ich Vrsel sein Hausuro^ew vnd vnser erben, vnuerschaidenleich der oftgenannten gu^elt dez egenanten meins Pru^eder Jansen dez Helffants vnd seiner erben recht gewer vnd scherm fu^er alle ansprach, alz Lehens vnd Satzung recht ist vnd dez Landez recht ze O^esterreich. Waer aber, daz in mit recht daran ieht abgieng, daz suln sie haben auf vns vnd auf allem vnserm gut, daz wir haben in dem Land ze Osterreich, wir sein lebentich oder tode. Vnd geben in darvber disen brief zu einem warn vrchunde diser sach versigilt mit vnserm Insigil vnd mit vnsers Lehen herren Insigil, dez vorgenanten hern Nichlas von Cheyawe, der diser sach gezeuge ist mit seinem Insigil. Diser brief ist geben ze Wienne nach Christes gepurd dreutzehen hundert iar darnach in dem fuemf vnd viertzgisten iar, an vnsers herren Gots Leichnam Tag.

Source Fulltext: HAUSWIRTH, Schotten (=FRA II/18, 1859) S. 250-251