Ich Niclas von Huntshain vergich offenleichen an disem brief vmb den Hoef, gelegen datz sant Vlreich bei Wienne, des ich rechter stifter vnd sto^erer vnd Purcherr pin, vnd der leit zenest dem Pharrho^ef, dovon man mir alle iar dient sechs schilling wienner phennig, drei schilling an sande Jo^ergen tage, drei schilling an sande Michels tage, ze rechtem dienst, vnd der weilnt vrowen Ellen von Potenstain gewesen ist, denselben Hof mit alle dev vnd darzu gehoert, hat der erber Herr Maister Andre, zu den zeiten Bischolf Gotfrits Official von Passaw, mit meiner hant gechauft vnd bestet dem egenanten Gotshaus des hailigen Herren sande Vlreichs, furbaz ewichleichen vnd vnuerchumert dabei ze beleiben seiner Sel vnd aller seiner vordern vnd nachomen Seln ze Helf vnd ze Trost so beschaidenleichen, daz er vnd alle sein nachomen Pharrer datz sande Vlreich furbaz mir vnd meinen Erben alle iar die vorgenanten Sechs schilling phennig dovon dienen schuln zu den Tegen, als vorgeschriben stet, ze rechtem dienst an allen chrieg vnd an allen irrsal, vnd auch vnuerschaiden aller anderr sache, als vns ander vnser Holden dienent. Vnd des ze vrchunde gib ich dem vorgenanten Gotshaus datz sande Vlreich disen brief versigilt mit meinem Insigil vnd mit des erbern manns Insigel Otten des Reschleins Purger ze Wienne, der diser sache gezeug ist mit seinem Insigel vnd anderr erberr levt genu^ech. Der brief ist geben ze Wienne nach Christs gebvrde dreutzehen Hvndert Iar darnach in dem fvnf vnd virtzigistem iar, an sande Merteins Tage.

Source Fulltext: HAUSWIRTH, Schotten (=FRA II/18, 1859) S. 251-252