Ich Fridreich der Helphant vnd ich Vrsula sein Havsvrow vnd vnser paider Erben wir vergehen vnd tvn chvnt alle den, die disen prief sehent oder horent lesen, die nv lebent oder hernach chvnftich sint, Daz wir mit gvtem willen, mit verdahtem mvt vnd nach vnser pesten frevnt rat, ze der zeit, do wir iz wol getvn mahten, reht vnd redleich ze chavffen haben gegeben vnsers rehten aigens ahtzich phenning geltes Wienner phenning, daz do gelegen ist dacz Hittendorf auf vberlent, vm drev phunt rehter Wienner phenning, der wir gantz vnd gar gewert sein, meinem Prueder Jansen dem Helphant und alle seinen erben mit alle dem nutzen vnd rehten, als wir daz in aigens gewer herpracht haben, fvrbaz ledichleich vnd freileich ze haben vnd allen im frum domit schaffen mit verchavffen, versetzen vnd geben, swem si wellen, an allen irrsal. Wer aber, daz si mit reht icht chrieges daran gewunnen, iz wer von ansprach oder von welherlai Sachen daz wer, daz mit reht wer, denselben schaden sulle wir in allen abtragen an alle ir mve, vnd schullen iz auch habn auf vns vnd auf alle dem gvt, daz wir habn in dem Lande ze Osterreich, wir sein lebtich oder tot. Vnd daz in die rede furbaz staet vnd vnzebrochen beleib, darvber geb wir in disen prief versigelt mit vnserm Insigel vnd mit des erbern mannes Insigel Jansen des Maeren, der derselben sach gezeug ist mit seinem Insigel. Der prief ist gegebn ze Niedernleizz nach Christes gepurd Dreutzehn hvndert iar darnach in dem aht vnd virtzgisten iar, an sand Mertten tag.

Source Fulltext: HAUSWIRTH, Schotten (=FRA II/18, 1859) S. 259