Ich Elzbetht, Hylprantes hausvrow des Schilter, dem Got gnad, vergich mit disem prief allen den, die in sechent, horent oder lesent, die nu lebent vnd hernach chumftig sind, daz ich mit guetem willen vnd mit verdachtem muet vnd nach meines vater Haugen des Smides vnd meiner Mueter Perithte geschaeft, den got gnad, zwai phunt Wienner phenning geltes gegeben vnd geschaft han den Erbern Geistleichen herren dem . . . Conuent vnd der gemayn des Goteshaus vnser vrowen dacz den Schotten ze Wienn auf ainem weyngarten, der haizzet der Spaet, des drev viertail sint, davon man dient den Geystleichen vrowen ze Tullen in daz vrowen Chloster alle iar in dem Lesen an zwen sibenczich Wienner phenning ze Perchrecht vnd nicht mer, vnd ist gelegen zenaechst des Pharrer weingarten ze Toblich, also, daz die egenanten herren dacz den Schotten ain Ewigen Jartag davon begen su^ellen meiner sel vnd meines wirtes sel vnd allen meiner vodern selen ze hilf vnd ze trost an sand Gedrauten tag, auch sol man die zway phunt Wienner phenning von dem vorgenantem weingarten dienen hincz den Schotten. So su^ellen auch die Geystleichen herren daz den Schotten den armen Leuten vnd den Durftigen in dem Puriger Spital ze Wienn alle iar ayn phunt Wienner phenning oder heblig dafu^er geben, die man vnder die chranchen Leut tail, als verr si geraihen mugen. Ich schaff auch daz, ob daz waer, daz man die egenanten zwai phnnt geltes drev Jar versaezz, so sullen die oftgenanten herren dacz den Schotten des vorgenanten weyngartens vnderwinden an allen chrieg vnd widerred der worden. Daz daz vorgenant geschaeft vnd Jartag ewig vnd staet beleib, so gib ich offtgenantev Peritht disen Prief versigelten mit des Erbern mannes Insigel Maister Hainreichs, der ze den zeiten Percher vnd verwesaer was der vrowen von Tuln, vnd mit des Erbern mann Insigel Chunrat in dem Hymel, die diser sach gezeug sint mit irn Insigel. Der prief ist geben ze Wienn, do von Christes geburd ergangen waren dreuczehen hundert iar darnach in den Neun vnd vierzigistem Jar, an Sand Larenczen Tag.

Source Fulltext: HAUSWIRTH, Schotten (=FRA II/18, 1859) S. 262-263