Ich Jacob zu^e den zeiten wirt in des edeln Herren Haus hern Chadoltz von Ebersdorf vnd ich Preunhilt sein Hausurow wir veriechen vnd tuen chu^ent allen den, die disen prief lesent oder horent lesen, die nu lebent vnd hernach chu^emftich sint, daz wir vnd vnser erben (mit) gu^etem willen vnd gu^enst, mit verdachtem mu^et, mit gesampter Hant, zu der zeit, do wir iz wol getuen mochten, vnd auch mit vnsers Amptmans Hant Chuenrats dez Poppen, zu den zeiten Amptman der Chappeln gu^et ze sant Pangretzen an dem Hoeff ze Wienn recht vnd redleichem verchauft haben vnser Haus, das do leit hinder sant Pangreczen zena^echst Mathes Haus des Choches, von dem man alle iar dient der egenanten Chappeln hintz sant Pangreczen achzechen Wienner phenning. Sechs phenning an sant Michels Tag, Sechs ze weinachten, Sechs an sant Jorigen tag, ze rechtem gruntrecht vnd nicht mer. Das vorgenant haus haben wir verchauft vnd geben mit allen dem nutz vnd rechten, als wir iz vnversprochenleichen in rechter gruntrechtes gewer herpracht haben, vmb vier phunt phennig Wienner mu^enzze, der wir gar vnd gancz gericht vnd gewert sein, Petrein Andren, Mychels aydem, vro^en Chunigunten seiner Hausurown vnd allen ieren erben, furbas allen ieren frum damit ze schaffen, verchauffen, verseczen vnd gewen, wem si wellen, an allen irsal. Wir sein auch vnverschaidenleichen mitsampt vnsern erben des egenanten Haus ir rechter gewer vnd scherm fu^er allev anspro^ech, als gruntrechts recht ist vnd der stat recht ze Wienne. Wer aber das, das si an den egenanten Haus mit recht icht chrieges oder anspro^ech gewunen, von wem das wer, was si des schaden nement, das schullen wir in alles auzrichten vnd widercheren an all ir mue. Daz loben wir in ze laisten mit vnsern trewn, vnd was in doran abget, das schullen si haben vnverschaidenleichen auf vns vnd auf vnserm gu^et, das wir haben in dem Lande ze Osterreich, wir sein Lemtig oder to^et. Vnd das diser chauf fu^oriwas stet sei vnd vnzeprochen peleiw, wan ich vorgenanter Jacob vnd ich Preunhilt sein hausvrow nicht aygens Insygels haben, dorvber gewen wir den egenanten Petrein, Vro^en Chunigunten seiner Hausuro^ewn vnd ieren erben disen Prief versigelt mit des vorgenanten vnsers Amptmans Insigel Chuenrats des Poppen vnd mit Arnoltz Insygel in dem teufen grawen ze Wienn, zu den zeiten Amptman vnd phleger der Chappeln gu^et in der Pu^erch ze Wienn, die dieser Sache gezeug sint mit ieren Insygeln. Diser Prief ist gegewen ze Wienne nach Christes gepurd Dreuzehen Hundert iar darnach in dem Neun vnd Viertzgisten iar, an sant Margreten Tag.

Source Fulltext: HAUSWIRTH, Schotten (=FRA II/18, 1859) S. 261-262