Ich Ortolf der Pyrbovmer vnd ich Elspet sein Hausfrow vnd vnser paider erben wir vergehn vnd tvn chvnt allen den, die disen prief sehent oder horent lesen, die nv lebent oder hernach chvnftich sint, Daz wir ze chovffen haben gegeben vnsers rechten aigens einen acher vnd ein wis pei demselbn acher, daz do gelegen ist dacz Purstendorf pei dem pruklein, vm fvnf phunt rehter Wienner phenning dem erbern manne Jansen dem Helphant vnd alle seinen Erben, fvrbaz ledichlich vnd freileich ze habn vnd allen irn frvm domit schaffen mit verchovffen, versetzen vnd gebn, swem si wellen, an alle irrsal. Vnd wir sein ouch des vorgenanten acher vnd der vorgenanten wis ir reht gewer vnd scherm fvr alle ansprach, als aigens reht ist vnd des landes reht ze Osterreich. Wer aber, daz si icht chrieges gewunnen von dem vorgenanten acher vnd ouch von der vorgenanten wis, das mit reht wer, daz schullen wir in allez auzrihten an alle ir mve vnd an allen irn schaden. Daz lob wir in ze laisten mit vnsern trewn vnd si schullen iz ouch habn auf vns vnd auf alle dem gvt, daz wir habn in dem Land ze Osterreich, wir sein lebntich oder tot. Daz in die red fvrbaz staet vnd vnzebrochen beleib, darvber geb wir in disen prief versigelt mit vnserm Insigel vnd mit Ruepprechts Insigel von Purstendorf, der derselben sach gezeug ist mit seinem Insigel. Der prief ist gegebn ze Nidernleizz nach Christes gepurd Dreutzehn hvndert iar darnach in dem ainsmenfvnftzgisten iar, des Eritages vor dem Antlaztag in der lesten vastwochen.

Source Fulltext: HAUSWIRTH, Schotten (=FRA II/18, 1859) S. 272