Ich Seifrid der Goltsmid vnd ich Angnes sein Hausurow vnd vnser Erben Wir vergehen vnd Tun chunt allen den, die den brief lesent oder hörent lesen, die nu lebent vnd hernach chunftig sind, vmb di Viertzehen phunt Wienner phenning, di wir gehabt haben auf dem weingarten, der do leit ze Otakchring bei der Chirchen, des drew Virtail sind, vnd der do haist der Feial, vnd den der erber mann Mathes der Pirbaumer von Otakchring vnd vraw Elspet sein hausurow vnd ir Erben von Niclasen dem Chlöcher vmb ir aigenhaffts ledigs varund gut gechaufft habent, als ir chaufbrief sagt, den si darvber habent, das vns, mich vorgenanten Seifriden den Goltsmid vnd mich Angnesen sein hausurown vnd vnser Erben, der erber man her Leupolt der Poltz purger ze Wienne der obgenanten Viertzehen phunt Wienner phenning, di wir auf dem obgenanten Weingarten gehabt haben vnd di er in seiner phlegnuzz inn gehabt hat, vntz das ich vorgenante Angnes vogtpar warden pin, an des egenanten Mathes stat des Pirbaumer gar vnd genczlich verricht vnd gewert hat. Nu haben wir den brief, der vmb diselben viertzehen phunt wienner phenning auf dem obgenanten weingarten do sagt, in meiner herren der purger Rat, di denselben brief in irm Rat gehabt habent, verlorn, also daz si den in irm Rat nicht vinden mvgen, vnd darumb so geben wir dem vorgenanten Mathesen den Pirbaumer vnd vrown Elspeten seiner hausurown vnd irn Erben den gegenburtigen brief mit der beschaidenhait, daz wir, ich vorgenanter Seifrid der Goltsmid vnd ich Angnes sein hausurow, noch vnser Erben noch niempt von vnsern wegen weder mit dem brief, der verlorn ist, noch an brief vmb di vorgenanten viertzehen phunt Wienner phenning hintz in noch hintz allen irn nachchömen, di den obgenanten irn weingarten nach in inne habent, dhain ansprach noch vadrung nimmer mer gehaben noch gebinnen suln, weder vil noch wenich. Wer aber, daz darv¨ber der brief vmb di viertzehen phunt phenning, der do verlorn ist, herfür cheˆm, vnd daz der egenant ir weingarten damit ansprechig würde, der sol dhain chrafft nicht enhaben vnd sol auch aller sache tod vnd zenichte sein. Nemen sev des darv¨ber dhainen schaden vmb diselben viertzehn phunt phenning, daz sullen sev vnuerschaidenlichen haben auf vns vnd auf allem vnserm Gut, daz wir haben in dem Lande ze Osterreich oder swo wir es haben, wir sein lebentig oder tod. Vnd wenn wir selber nicht aigens Insigils enhaben, darv¨ber so geben wir in den brief ze einer ewigen vestigung der sach versigilt mit der Erbern Lawt Insigiln hern Hainreichs des Wurffels, purger ze Wienn vnd ze den zeiten Amptman des Chlosters ze Neunburch, der des obgenanten weingarten von des Chlosters wegen ze Neunburch Amptman ist, vnd hern Michels des Vierdungs, ze den zeiten Statrichter ze Wy¨enne, di wir des vleizzichlich gepeten haben, daz si der saeh Getzewgen sind mit irn Insigiln. Der brief ist geben ze Wienn nach Christi gepurd drewtzehen hundert Jar darnach in dem Sechtzigistem Jar, des nasten vreytags nach sand Lucein Tag.

Source Fulltext: HAUSWIRTH, Schotten (=FRA II/18, 1859) S. 311-313