Ich Jans der Sneyder vnd ich Margret sein Hausvrow vnd vnser Erben Wir vergechen offenleichen an dem brief, Daz wir vnuerschaidenlich gelten sullen hern Mathesen, Wolfharts Sun von Ruspach, Chorherr ze Prespurch, Sechtzehen phunt wyenner phenning, die gaebich sind, vnd die er vns auch berait durich trew vnd durich gu^et gelichen hat, vnd damit wir auch zwai phunt wyenner phenning gelts ewigs Purchrechts, di wir von vnserm haws, gelegen bey der Hymelparten ze wyenn auf der Hulm, vormals gedient haben, abgeledigt vnd gelöst haben, ain phunt von den erbern geistlichen vrown datz sand Larentzen ze wyenn vnd ain phunt von den erbern geistlichen vrown datz sand Jacob auf der Hulm ze wyenn, vnd darvrnb so haben wir, ich egenanter Jans der Sneyder vnd ich Margret sein Hausurow vnd vnser erben, dem egenanten hern Mathesen vnd seinnen Pru^edern oder seinen erben zway phunt wyenner phenning gelts purchrechts verschriben vnd verschreiben auch im, seinen Pru^eder vnd seinen erben, oder swem er di schafft oder geit, zwai phunt wyenner phenning gelts purchrechts mit vnsers Gruntherren hant des erbern manns hern Christans des Poherlitzer, ze den zeiten Amptman der Schotten Gu^et ze wyenne, auf vnserm haws, das vorgenant ist, gelegen bey der Hymelparten ze wyenne auf der Hulm, daz weilen des Münsser gewesen ist, zenäst dem Haws, das weilen Andres des Verbetschen gewesen ist, vnd do man von dem egenanten vnserm Haws alle Jar dient den Erbern geistleichen herren datz den Schotten ze wyenne vier wyenner phenning ze Gruntrecht, und den erbern geistleichen herren datz dem Heyligenchräutz zway phunt wyenner phenning gelts ze Pu^erchrecht vnd nicht mer. Es sind auch die egenanten zway phunt wyenner phenning gelts pu^erchrechts fuerbaz alle Jar davon ze diennen ze drin Taegen, an sand Jorgentag, an sand Mychelstag vnd ze weichnachten, ye ze dem Tag zehen vnd fumf Schilling wyenner phenning, mit alle den nutzen vnd Rechten, als man ander Pu^erchrecht dient in der Stat ze Wyenne, vnd sind auch mit dem ersten dienst anzeheben an sand Jo^ergentag, der nu schirist chumt. Vnd swenn der dienst versezzen wirt, so ist denn furbas ye ze viertzehen Tage darauf ze vragen vnd zwispil darauf ze behaben, als vmb versezzens Purchrecht Recht ist vnd der Stat recht ist ze Wyenne. Vnd sind auch abzelosen, swenn wir oder vnser nachchomen daz tun wellen oder mugen, ye ain phunt Gelts mit acht phunden wyenner phenning vnd den nästen dienst damit, der davon ze dienen gewellet, an allen chrieg. Es sol auch der egenant her Mathes vnd sein Pru^eder vnd Erben, oder swem Er di zwai phunt Gelts schafft oder geit, auf dem egenanten vnserm haws fu^erbas ledichleichen vnd vreileichen haben vnd allen irn frumen damit ze schaffen, verchauffen, versetzen vnd geben, swem seu wellen, an allen chrieg vnd irrsal. Wir sein auch vnuerschaidenleich mitsampt vnsern Eriben der zwair phunt wyenner phenning gelts purchrechts auf dem egenanten vnserm Haws ir recht Gewern vnd scherm fu^er alle ansprach, als purchrechts Recht ist vnd der Stat Recht ze Wyenn. Get in furbaz daran icht ab mit Recht, das schullen seu haben auf vns vnuerschaidenlich vnd auf allem vnserm guet, daz wir haben in dem Land ze Osterreich, wir sein lebentig oder Tod. Vnd wenn wir selb nicht aygens Insigils enhaben, darvber so geben wir In den brief ze einem offen v^erchund der sach versigilt mit des egenanten vnsers Gruntherren Insigil des erbern manns hern Christans des Poherlitzer, ze den zeiten Ambtman der Schotten Gut ze Wyenne, vnd mit des erbern manns Insigil hern Jacobs des Mundoffen Purger ze Wyenn, di wir des vleizzichleich gepeten haben, daz seu der sach Getzeug sind mit irn Insigiln, in selb an allen schaden. Der brief ist geben ze Wyenne nach Christi gepurd Drewtzehen Hundert Jar darnach in dem Zwai vnd Sechtzkistem Jar, des nasten Montags var sand Mathye Tag.

Source Fulltext: HAUSWIRTH, Schotten (=FRA II/18, 1859) S. 316-317