Ich Niklas, hern Jacobs Sun von Eslarn selig, vnd ich Katrey sein hausurow wir vergehen vnd tuen chunt allen den, di den brief lesent oder horent lesen, die nu lebent vnd hernach chunftig sind. Daz wir mit vnser erben gutem willen vnd gunst, mit verdachtem mut vnd mit gesampter hant, ze der zeit, do wir es wol getun mochten, vnd mit des erbern mannes hant Christans des Poherlitzer, ze den zeiten Amptman der Schotten Gut ze Wienn, Recht vnd redleich verchaufft haben vnser Haws, gelegen an sand Peters vreythof ze Wienn zenast hern Christoffers haws von Wulkendorf an aym tail vnd zenast dem Gezzlein bei hern Chunrats haws des Prentzer an dem andern tail, do man von demselben haws alle iar dient den Schotten ze Wienn zwen wienner phenning ze Gruntrecht vnd nicht mer. Daz vorgenant Haws haben wir verchaufft vnd geben mit allen den nutzen vnd rechten, als wir das vnuersprochenleichen in purchrechts gewer herpracht haben vnd als auch ez mit alter herchomen ist, vmb hundert phunt vnd vmb fumf vnd sibentzich phunt wienner phenning, der wir gar vnd gentzleichen verricht vnd gewert sein, dem erbern mann Niclasen dem Luchner, purger ze Wienne, vnd vrown Agnesen seiner hausurown vnd ir baider erben, furbas ledichleich vnd vreileich ze haben vnd allen irn frumen domit ze schaffen, verchauffen, versetzen vnd geben, swem si wellen, an allen chrieg vnd irrsal. Vnd sein auch wir mitsampt vnsern erben vnuerschaidenleich des vorgenanten hawses ir Recht gewern vnd scherm für alle ansprach, als purchrechts recht ist vnd der Stat recht ze Wienn vnd auch des Landes recht ze Osterreich. Get in furbaz daran icht ab mit recht, oder ob si mit recht icht chriegs oder ansprach daran gewunnen, von swem daz wer, daz sullen wir in allez auzrichten, ablegen vnd widerchern an all ir mue vnd auch an allen irn schaden. Vnd sullen si daz haben auf vns vnd auf vnsern erben vnuerschaidenleich vnd auf allem vnserm gut, daz wir haben in dem Lande ze Osterreich, wir sein lebentig oder tode. Daz der chauf furbaz also staet sey vnd vntzebrochen beleibe, darv^eber so geben wir in den brief zu einem warn vrchund vnd zu einer ewigen vestigung der sach versigilt mit vnserm Insigil vnd mit hern Christans Insigil des Poherlitzer, ze den zeiten Amptman der Schotten gut ze Wienn, vnd mit vnsers Swagers Insigil des erbern Ritter hern Christoffers von Wulkendorf vnd mit vnsers Vetern Insigil hern Hermans von Eslarn, purger ze Wienn, di der sach getzeugen sint mit irn Insigiln. Der brief ist geben ze Wienn nach Christs gebürde drewtzehen Hundert iar darnach in dem zwai vnd sechtzgisten iar, dez naechsten vreytags nach sand Jorigen Tage.

Source Fulltext: HAUSWIRTH, Schotten (=FRA II/18, 1859) S. 317-318