Ich Hainreich der Porawer vnd ich Anna sein hausurow vnd alle vnser erben wir vergehen vnd tun chunt allen den, die den brief lesent oder horent lesen, die nu lebent vnd hernach chunftig sint, daz wir mit gutem willen, mit verdachtem mut vnd mit gesampter hant, zu der zeit, do wir es wol getun mochten, vnd mit vnsers Lehenherren hant des Erbern herren hern Hainreichs von Prunne, verchoufft haben vnsers rechten Lehens, daz wir von im ze lehen gehabt haben, vnsern halben Dorftzehent ze Nidern Grub, gelegen pei Mannlebarn, Getraidzehent vnd weinzehent, grözzer vnd chlainer, ze velde vnd ze dorffe, es sei gestifft oder vngestifft, versucht oder vnuersucht, wie so das genant ist. Denselben halben Dorftzehent haben wir recht vnd redleieh verchoufft vnd geben mit allen den nutzen vnd rechten, als wir in in Lehens gewer herpracht vnd innegehabt haben, vmb siben vnd sechtzig phunt wienner phenning, der wir gantz vnd gar gewert sein, dem vesten Ritter hern Otten dem Floyt von Pörssenpruenne vnd seinen erben, fu^erbaz ledichleich vnd vreileich ze haben vnd allen iren frumen damit ze schaffen, verchouffen, versetzen vnd geben, wem si wellen, an allen irrsal. Vnd sein ouch wir, ich egenanter Hainreich der Porawer vnd ich Anna sein hausurow vnd alle vnser erben, vnuerschaidenleich des vorgenanten halben Dorfzehents ze Nidern Grub mit allen den nutzen vnd rechten, so vorgeschriben stet, des vorgenanten hern Otten des Floyts von Pörssenpru^enne vnd seiner erben Recht gewern vnd scherm für alle ansprach, als Lehens recht ist vnd des Landes recht ze Österreich. Wer aber, daz si fürbaz mit recht icht chrieges oder ansprach daran gewunnen, von wem das wêr, was si des schaden nement, daz sullen wir in alles ausrichten vnd widerchern an allen iren schaden, vnd sullen ouch si das haben ouf vns vnuerschaidenleich vnd ouf allem vnserm Gut, daz wir haben in dem Lande ze Österreich, oder wa wir es haben, wir sein lebentig oder tode. Vnd das der Chauf fürbas also stet vnd vntzerbrochen beleibe, darüber so geben wir in den prief zu einem waren vrchunde der sache versigilten mit vnserm Insigil vnd mit mein egenanten Hainreichs pruder Insigiln Vlreichs vnd Fridreichs der Porawer, die der sach gezeug sint mit irn Insigiln. Der brief ist geben nach Christes geburde dreutzehen hundert iar darnach in dem sechs vnd sechtzgistem iare, des nechsten Mitichens vor sant Michelstag.

Source Fulltext: HAUSWIRTH, Schotten (=FRA II/18, 1859) S. 324-325