Ich Jans der Syrncher ze Volderndorf vnd ich Elsbet sein Hawsfrow vnd alle vnser bayder erben vergechen öffenlich mit dem brif allen, di in lesent oder horent lesen, di nu lebent vnd hernach chunftig sind, mit guter vorbetrachtung, mit gesampter hant vnd Rat vnd gunst aller vnser nagsten vnd pesten vrewnt vnd ander erber lewt, ze der zeit, da wir iz rechtleich wol getün machten, vnsers Rechten vreyn aygens, Syben Jewchart akchers vnd ain Jewchart Aw vnd Griz, gelegen datz Lewpoltzdorf. Dieselben eegenanten Acht Jewchart akcher, Griez vnd aw mit allen den Ern, Rechten vnd nutzen, die darzu gehorent, versucht vnd vnuersucht, als wir sew vnuersprochlich in aygens gewer herbracht haben, also haben wir sew ze Rechtem Purkchrecht Recht vnd Redleich verchaufft vnd geben vmb sechs vnd zwaintzik phunt wienner phenning, der wir gentzleich vnd gar verricht vnd gewert sein, dem erbern mann Wolfharten datz Volderndorf vnd seinen erben mit Acht wienner phenning dienst, die er mit Rat vnd gunst aller seiner Erben vnd vrewnt vnd erber lewt darauf gesatzt hat, ewichleich Er vnd sein erben, oder wer die egenannten acht Jewchart akcher griez vnd aw inne hat, davon ze diennen dem erbirdigem Gestleichem herren hern Clementen, ze den zeiten Abt des Gotzhaus vnser vrowen datz den Schotten ze Wyenne vnd dem Conuent gemainlich daselbs vnd allen irn nachkomen vnd nicht mer, also daz der egenant Wolfhart vnd sein erben die egenanten acht Jewchart akcher, Aw vnd griez mit dem egenanten aufgesatztem dienst furbas ledichleich vnd vreylichinn ze haben vnd allen irn frumen damit schaffen mit versettzen, verchauffen vnd geben, wem si wellen, an allen chrieg vnd irrsal. Auch pin ich egenanter Jans der Syrncher mitsampt mein erben der vorgenanten acht Jewchart akcher, aw, griz des obgenanten Wolfhartz vnd seiner erben Recht scherm vnd gewern für alle ansprach. Waer awer, das sew daran mit Recht icht chriegs oder ansprach gewünnen, von wem daz wer, das sulle wir in alles ausrichten, ablegen vnd widercheren an all ir mue vnd an allen irn Schaden. Vnd sullen sew das haben auf vns vnd alle dem gut, das wir haben in dem lannde ze Österreich, oder wo wir iz haben, wir sein lembtig oder tode. Das dise sach fürbas also stet vnd vnzebrochen beleib, darüber gib ich offtgenanter Jans der Syrncher vnd ich Elspet sein hausurow vnd vnser erben dem obgenanten Wolfharten vnd seinen erben den brief ze ainem offen vrchunt vnd ewigen vestigung der sach versygelt mit meinem Insygel vnd mit meines bruder Fridreichs des Syrncher Insygel. Der brief ist geben nach Christs gepurd Drewtzehen hundert Jar darnach in dem sechs vnd sechtzkistem Jar, an Gotes Leychnam Tag.

Source Fulltext: HAUSWIRTH, Schotten (=FRA II/18, 1859) S. 323-324