In nomine domini amen. Nouerint vniuersi, ad quos presentes peruenerint, et maxime hij, quorum de subscriptis interest vel intererit aliqualiter in futuro, quod, cum reuerendus in Christo pater dominus Clemens, abbas monasterii sancte Marie Schotorum Wienne ordinis s. Benedicti Patauiensis dyocesis, et conuentus eius suo et dicti monasterii nominibus coram nobis Ludero, officiali curie Patauisiensis, contra discretum virum dominum Johannem, plebanum in Enczistorf super Vischa, et eius ecclesiam super duodecim solidis denariorum Wiennensium annui census, quos plebanus in Enczistorf, qui pro tempore fuerit, predictis abbati et monasterio raciorie subieccionis ipsius ecclesie parrochialis in Enczistorf prenominato monasterio Schotorum annis singulis circa festum purificacionis beate virginis soluere tenetur, questionem mouere cepisset, cumque in dicta causa ad aliquot actus, videlicet vsque ad terminum probacionis, seruato iuris ordine coram nobis legittime processum fuisset, predictus Johannes, plebanus in Ênczistorf, saniori ductus consilio de iure suo diffidens predicte liti coram nobis et in nostris manibus cessit ac omni defensioni sibi in dicta causa contra prenominatos abbatem et conuentum competenti sponte et non coacte sed libere resignauit, asserens, se sufficienter et plene per documenta legittima predictorum abbatis et conuentus instructum, quod dicta ecclesia in Enczistorf et plebanus, qui pro tempore fuerit, sepefatis abbati et conuentui racione subieccionis, vt prefertur, duodecim solidos denariorum singulis annis in festo purificacionis beate virginis Marie soluere teneantur. Nos igitur officialis predictus, prefata confessione coram nobis facta, predictos Johannem plebanum et ecclesiam parrochialem in Enczistorf ad solucionem duodecim solidorum denariorum singulis annis Wiennensium in festo purificacionis beate virginis Marie predictis abbati et conuentui condempnamus nostra diffinitiua sentencia mediante. Acta sunt hec in domo habitacionis nostre Wienne, nobis more solito ad reddendum iura pro tribunali sedentibus, anno domini domini millesimo trecentesimo sexagesimo octauo, indictione VIta, pontificatus sanctissimi in Christo patris et domini nostri domini Vrbani diuina prouidencia pape Vti. anno septimo, sabbato post festum beati Andree apostoli, hora tertiarum, presentibus religiosis et discretis viris fratre Donato, monacho professo dicti monasterii Schotorum, Piligrimo de Wuldestorf, jurisperitis, fratre Jacobo professo sacri montis ac cenobii s. Martini in Vngaria ordinis s. Benedicti, Pataviensis et Jaurinensis dyocesum, et pluribus aliis testibus in premissis. In quorum omnium et singulorum testimonium de prescriptis hoc presens instrumentum publicum per notarium publicum infrascriptum mandauimus confici et nostri sigilli appensione communiri. Et ego Petrus Petri de Chremsa Patauiensis dyocesis, publicus imperiali auctoritate notarius, premissis omnibus et singulis unacum predictis testibus presens interfui ac exinde de mandato dicti domini offïcialis hoc publicum instrumentum confeci, propria manu scripsi solitoque signo meo signaui in testimonium premissorum.

Source Fulltext: HAUSWIRTH, Schotten (=FRA II/18, 1859) S. 331-332