Ich Jörig, zu den Zeiten pharrer ze Maispirbaum, vergich vnd tun chunt allen den, die den brief lesent oder horent lesen, die nu lebent vnd hernach chunftig sint, daz ich mit gutem willen, mit verdachtem mut, zu der zeit, da ich es wol getun mocht, vnd mit meins Gruntherren hant des erwirdigen geistleichen herren hern Clemens, Abt des Gotshauses vnser vrown datz den Schotten ze Wienn, verchaufft han mein Haus, daz mir mein Vater her Chunrat, zu den Zeiten pharrer ze Niedern Holebrunn, ledichleich gemacht vnd gegeben hat, ze verchauflen vnd ze versetzen vnd allen meinen frumen damit ze schaffen, als der brief sagt, den er mir besunderleich daruber gegeben hat, vnd leit ouch daz vorgenant Haus in der Weihenpurch ze Wienn zenechst dem Haus, daz weilen der herren von Varenpach gewesen ist, da man von dem egenanten meinem haus alle iar dient den geistleichen herren datz den Schotten zwen wienner phenning ze Gruntrecht vnd nicht mer. Daz vorgenant Haus han ich Recht vnd redleich verchaufft vnd geben mit allen dem nutz vnd rechten, als ich es in purchrechts gewer herpracht han vmb fumftzig phunt wienner phenning, der ich gantz vnd gar gewert bin, dem erbern herren Maister Chunraten von Salder dem Puechartzt, zu den zeiten Chorherre datz sant Stephan ze Wienn, der dasselb haus vmb sein ledigs varund gut gechaufft hat, fürbas ledichleich vnd freileich ze haben vnd allen seinen frumen damit ze schaffen, verchauffen, versetzen, schaffen oder geben, wem er welle, an allen irrsal. Vnd bin ouch ich vorgenanter Jörig des vorgenanten hauses des egenanten Maister Chunrats, oder wem er es schafft oder geit, rechter gewer vnd scherm für alle ansprach, als purchrechts recht ist vnd der Stat recht ze Wienn. Wer aber, daz si furbas mit recht an demselben Haus icht chriegs oder ansprach gewunnen, von wem daz wer, was si des schaden nement, daz sol ich in alles ausrichten vnd widerchern an allen iren schaden, vnd sullen ouch si daz haben ouf mir vnd ouf allen dem gut, daz ich han in dem Lande ze Österreich, oder wa ich es han, wie so daz genant ist, ich sei lebentig oder tode. Vnd daz der chauf furbas also stet vnd vntzebrochen beleib, daruber so gib ich in den brief zu einem warn vrchund der sach versigilten mit meinem Insigil vnd mit des Gruntherren Insigil des vorgenanten geistleichen herren Abt Clemens datz den Schotten vnd mit der erbern leut Insigiln hern Nichlas des Stayner vnd hern Jansen von Segenberch purger ze Wienn, die ich des gepeten han, das si der sach gezeug sint mit iren Insigiln. Der brief ist geben ze Wienn nach Christs gepurd Dreutzehen hundert iar darnach in dem Neun vnd Sechtzgisten iare, des nechsten Vreytags vor sant Agnesen tag.

Source Fulltext: HAUSWIRTH, Schotten (=FRA II/18, 1859) S. 332-333