Ich Swester Christein die Prunnerinne, ze den zeiten Priorinn in sand Larenczen Chloster an dem Alten Fleischmarkcht ze Wienne, vnd wir der gancz Conuent gemain daselbs vergeben vnd tun chunt alle den, die den briet lesent oder horent lesen, die nu leben vnd hernach chunftig sind, vmb alle die Erbgueter, so Fridreich seliger der Vorlawf geschafft hat seinen chinden, die er hat mit vrown Angnesen seiner wirtinne auch seliger gedechtnusse, des ersten, Annen, Jansen vnd Angnesen zu einander vnd darnach sunderleichen Junchurowen Kathrein einen weingarten, gelegen ze Suffring genant die Pewnt, vnd darzue funfczig phunt beraiter wienner phenning, damit man sey in ein vrownchloster geben solt, in welichs chloster si begeret, als der Geschefftprief sagt, den er hinder im lazzen hat, vnd dasselb geschefft den erbern Lewten hern Pawln dem Pewrberger vnd Lewppolten dem Metsakch ze volfurn empfolchen hat, vnd darnach die drew chind Ann, Jans vnd Angnes nach irs vater vnd Mueter töd der egenanten Friedreichs vnd Angnesen auch mit dem töd abgegangen sind vnd alle irrew gueter, die in geschafft sind nach des egenanten geschefftpriefs sag, geerbt vnd geuallen sind auf ir swester die obgenanten Junchurown Kathrein vnd auch im offem Rat der Stat ze Wienne ir mit dem rechten gesprochen vnd gevallen sind, vnd die obgenanten Erbgu^eter der egenanten geschefftherren her Pawl der Pewrberger hat gepawt vnd ettleich geltschuld an der obgenanten chind stat vergolten hat, das man im an dem Paw vnd geltschuld, so er fur die chind geben hat, ist schuldig beliwen zwai hundert phunt phenning vnd vier vnd virtzig phunt phenning, alles wienner mu^enizz. Darnach habent die vorgenanten geschefftherren die obgenanten junchurown Katrein pracht fur offen Rat, die hat do mit gutleichem willen vnbedwungenleichen begert mit leib vnd mit gut in das egenant vrownchloster ze sand Larenczen ze Wienne, darin man sey mit leib vnd mit gut geben hat. Vnd darumb so haben wir mit wolbedachtem mut vnd mit gemainem veraintem Rat vnd auch nach des Rates Rat der egenanten Stat ze Wienne ze der zeit, do wir es wol getun machten, vnd mit vnser Pergmaister handen, des ersten mit des erbern manns hant Otten von Teben gesessen ze Grinczing, ze den zeiten Amptman vnd Phleger der geistleichen herren gut ze vnser vrown tron ze Geˆmnikch des Ordens von Kartus, verchaufft haben ain weingarten, gelegen an dem Schenchenperg ze Grinczing zenast hern Christoffs weingarten des Syrfeier, des funf viertail sind, vnd da man von drin viertailn weingarten alle iar dient den obgenanten herren ze Gemnikch ain Emmer weins ze Perchrecht vnd ain wienner phenning ze voitrecht, vnd von dem halben Jeuch weingarten anderthalben emmer weins ze Perchrecht vnd drei helbling ze voitrecht vnd nicht mer, vnd darnach mit des erbern mans hant Valteins des Raidleins, ze den zeiten amptman vnd phleger der Geistleichen vrown gut ze sand Marie Magdalen, auch verchaufft haben ain weingarten, gelegen daselbs am Schenchenperg vnd haiz-zet das Glokkel zenast Hainreichs weingarten von Emmerstorff, des ein halbs Jeuch ist, do man auch alle iar von dient den Geistleichen vrown ze sand Marie Magdalen ze Wienne zehen wienner phenning fur Perchrecht vnd nicht mer. Die vorgenanten weingarten haben wir an der obgenanten geltschuld verchaufft und geben mit alle den nuczen vnd rechten, als die von alter vnuersprochenlichen in Perchrechts gewer herchomen sind, dem erbern man hern Pawln dem Pewrberger, der vorgenant ist, Purger ze Wienne, vnd seinen erben, oder swem er die schafft oder geit, furbas Ledichleichen vnd vreileichen ze haben vnd allen irn frumen damit ze schaffen, verchauffen, verseczen vnd geben, swem si wellen, an allen chrig vnd irrsal. Wir sein auch mitsampt vnsern nachchomen der obgenanten weingarten ir recht gewern vnd scherm fu^er alle ansprach, als Perchrechts recht ist vnd des Lanndes recht ze Osterreich. Get in furbas daran icht ab mit recht, das sullen si haben auf allem dem gut, das zu dem obgenanten vnserm chloster gehoret. Vnd das der chauf furbas also stet sey vnd vnczebrochen beleib, darüber so geben wir in den brief ze einem offen vrchund vnd ze einer ewigen vestnunge der sache versigilten mit mein obgenanten Christeinen Insigel der Prunnerinne, ze den zeiten Priorinne in sand Larenczen chloster ze Wienne, vnd mit vnsers des Conuents Insigel gemain daselbs vnd mit des obgenanten Perchherren Insigel des erbern Geistleichen herren Prueder Jannsens, ze den zeiten Prior ze Gemnikch des Ordens von Karthus, vnd mit der obgenanten Perchurown Conuentsinsigel der erbern Geistleichen vrown ze sand Marie Magdalen ze Wienne vnd mit der erbern Lewt Insigel hern Thomanns des Swemleins, ze den zeiten Purgermeister ze Wienne, vnd hem Stephanns des Leitner, die zeit des Rats der Stat daselbs ze Wienne, die wir des vleizzichleichen gepeten haben, das si der sach zewg sind mit irn Insigeln. Der brief ist geben ze Wienne nach Christi gepurd drewczehen Hundert iar darnach in dem ain vnd sibenczigistem Jar, des nasten Freytags var sand Veyts Tag.

Source Fulltext: HAUSWIRTH, Schotten (=FRA II/18, 1859) S. 339-341