Ich Pericht, Vlreich Mertteins wittih von Molmestorf, dem Got gnad, vergich vnd tun chunt allen den, die den brief lesent oder horent lesen, daz ich mit meiner Erben gutem willen vnd gunst, mit verdachtem mut, zu der zeit, do ich es wol getun mocht, vnd mit meins Gruntherren hant hern Jansen von Tirna, ze den zeiten Huebmaister in Osterreich, verchowfft han mein wisen, gelegen in dem Egelse, da man alle iar von dient hern Jannsen von Tirna zwaintzig wienner phenning, vnd den halben Newuang gelegen daselbens, der Chünrats der Haelreds wittiben gewesen ist, da man alle iar von dient hern Jannsen von Tirna achthalben wienner phenning, vnd ein viertail aus des Haelreds wisen, ouch gelegen daselbens bei dem Egelse, da man alle iar von dient hern Jansen von Tirna zwelif wienner phenning, alles ze gruntrecht vnd nicht mer. Das vorgenant Wismat han ich recht vnd redleich verchowfft vnd geben mit alle dem nutz vnd rechten, als es mich von meinem pru^eder Micheln dem Eibeinsprunner, dem ouch Got genade, angeerbt vnd angeuallen ist, vnd als es mit alter in gruntrechts gewer herchomen ist, vmb zwaintzig phunt wienner phenning, der ich gantz vnd gar gewert pin, dem erbern manne Wernharten dem Sleiher, purger ze Wienne, vnd seinen erben, oder wem er das vorgenant wysmad, das er vmb sein ledigs varund gut gechowfft hat, schaffet oder geit, fu^erbas ledichleich vnd vreileich ze haben vnd allen irn frumen damit ze schaffen, verchouffen, versetzen vnd geben, wem si wellen, an allen irresal. Vnd bin ouch ich obgenantev Pericht mitsambt allen meinen erben vnuerschaidenlich des vorgenanten wismats des egenanten Wernharts des Sleiher vnd seiner erben, oder wem er es schaffet oder geit, recht gewern vnd Scherm fur alle ansprach, als Gruntrechts recht ist vnd des Landes recht ze Österreich. Weˆr aber, daz si mit recht an demselben wismad icht Chriegs oder ansprach gewunnen, von wem das wer, was si des schaden nement, das sullen wir in alles ausrichten vnd widerchern an allen irn schaden, vnd sulln ouch si das haben auf vns vnd ouf allem vnserm gut, das wir haben in dem Lannde ze O^esterreich, wir sein lebentig oder tode. Vnd daz der Chawf furbas also staet vnd vnzerbrochen beleibe, vnd wannd ich obgenantew Pericht selber nicht aigens Insigils han, darumb so gib ich in den brief zu einem warn vrchunde der sache versigilten mit des Gruntherren Insigil des vorgenanten hern Jansen von Tirna vnd mit hern Vlreichs Insigil mit der Pettziehen, purger ze Wienne, die wir des vleizzichleich gepeten haben, daz si der sache gezewgen sind mit iren insigiln, darvnder ich mich verpinde mit meinen trewen, alles das staet ze haben vnd ze laisten, das vor an dem brief geschriben stet, der geben ist ze Wienne nach Christes gepu^erde Drewtzehenhundert iar darnach in dem ains vnd Sibentzgistem Jare, des nechsten Mittichens vor sand Jo^erigen tag.

Source Fulltext: HAUSWIRTH, Schotten (=FRA II/18, 1859) S. 338-339