Ich Hanns, ich Pernhart vnd ich Niclas, gepru>eder von Schaewchenstain, vnd alle vnser erben Wir vergehen vnd tun chunt allen den, die den brief lesent oder horent lesen, di nu lebent vnd hernach chunftig sind, Daz wir mit gutem willen, mit wolbedachtem mu^et vnd nach Rat vnserr vrewnd, zu der zeit, do wir es wol getun mochten, Recht vnd redleich verchoufft vnd gegeben haben dem erbern Ritter hern Otten dem Floyt vnd allen seinen Erben vnsers Rechten aygens sechsthalb phunt vnd acht vnd zwaintzig phenning wienner muenzze geltes gelegen ze Nidern Rustpaeh datz sand Oswalt vnd ze Eberstorf vnd ze Obern Rustpach datz sand Margreten ouf bestifftem gut behauster holden, vnd vnsern drittail, den wir gehabt haben an den aindlef Schillingen vnd zehen phenningen wienner mu^enzze geltes, die wir und vnser vetern Hanns vnd Wülfinch von Schaewchenstain gehabt haben ouf Niclas hof des ammans gelegen ze Obern Rustpach datz sand Margreten bei der Chirichen, vnd vnsern drittail, den wir gehabt haben an dem holtz gelegen an dem Staynperg vnd an dem holtz gelegen an dem Haêperg vnd an dem perchrecht gelegen an der Chel vnd an dem weingarten gelegen ze Nidern Rustpach hinder Rüdleins des Prenner hof vnd an dem zehentlein ouf aekcher gelegen auf dem Geraewtt ze Nidern Rustpach, da engegen die obgenanten vnser vettern Hanns vnd Wülfinch die andern zwen drittail derselben Güter aller gehabt habent, die der vorgenant her Ott der Floyt von in gechoufft hat, vnd vnsern drittail an allen den Gu^etern, die wir vnd die egenanten vnser vetern gehabt haben in den egenanten drin do^erffern ze Nidern Rustpach, ze Eberstorf vnd ze Obern Rustpach vnd darumb behausts gut vnd vberlent vnd alles, das darzu gehoret, in vrbar, ze holtz, ze uelde vnd ze dorff, es sei gestifft oder vngestifft, versücht oder vnuersücht, wie das genant ist, mit allen den nützen, wirden, ern vnd Rechten, als wir die vorgenanten vnsrew Güter allew mit aller irer zugehörung in aygens gewer herpracht haben, vnd als si mit alter herchomen sint, vmb Hundert phunt vnd vmb zehen phunt wienner phenning, der vns der egenant her Ott der Floyt gantz vnd gar verrichtet vnd gewert hat, also, daz er vnd sein Erben die vorgenanten Gu^eter allew, die wir in ze chowffen gegeben haben, mit aller irer zugehorung vnd mit allen nützen, wirden, ern vnd rechten, so vorgeschriben stet, suln fu^erbas ledichleich vnd freileich haben vnd allen irn frumen damit schaffen, verchouffen, versetzen vnd geben, wem si wellen, an allen irresal, vnd daz wir noch dhain vnser Erber vnd frewnd, wie die genant sint, fu^erbas die vorgenanten Gu^eter nimmermer chain ansprach noch Recht oder vodrung haben noch gewinnen sulln in dhainen wegen. Vnd durich pezzer sicherhait so setzen wir vns obgenanten drey pru^eder, ich Hanns, ich Pernhart vnd ich Niclas von Schaewchenstain, vnd alle vnser Erben vnuerschaidenlich vber die vorgenanten Gu^eter allew, die wir in ze chouffen geben haben, mit aller irer zu^egehorung, so vorbenant ist, dem egenanten hern Otten dem Floyt vnd allen seinen Erben ze rechten gewern vnd scherm fu^er alle ansprach, als aygens recht ist vnd dez landes recht ze O^esterreich. Wêr aber, daz in an denselben Gütern icht abgieng mit recht, oder daz si icht chrieges oder ansprach daran gewunnen, von wem das wêr mit recht, swas si des schaden nement, das sullen wir in alles ausrichten vnd widerchern an allen irn schaden, vnd sulln si das haben ouf vns vnuerschaidenlich vnd ouf allem vnserm Gut, das wir haben in den Lannden ze Österreich vnd ze Steyr, oder wo wir es haben, wie das genant ist, wir sein lebentig oder tod. Vnd daz der Chauf fu^erbas also stêt vnd vnzerbrochen beleib, daru^eber so geben wir dem oftgenanten hern Otten dem Floyt vnd allen seinen Erben den brief zu einem warn vrkund vnd ze einer ewigen vestnung der sache versigilten mit vnsern Insigiln vnd mit vnsers vettern Insigil Wu^elfings von Schaewchenstain vnd mit vnsers Ohems Insigil Chu^enrats des Schaêwrbeckchen, die der sache gezewgen sint mit irn Insigiln, in an schaden. Der brief ist geben nach Christes gepurt drewtzehenhundert Jar darnach in dem Sechs vnd Sibentzgistem Jare an sand Veytstag.

Source Fulltext: HAUSWIRTH, Schotten (=FRA II/18, 1859) S. 364-365