Ich Wolfgang vnd ich Hanns, gebru^eder die Straêwnen, vnd alle vnser Erben Wir vergehen offenlich mit dem brief umb den zehent ouf vierdhalben vnd zwaintzig gantzen lehen, gelegen ze Respitz vnd ze Stoytzendorf vnd ze Grêfendorf vnd ze Wartperg, getraidtzehent vnd weintzehent, grozzen vnd chlainen, vnd swas darzu^e gehöret, ze velde vnd ze dorffe, des ains vnd zwaintzig lehen sint lehen von dem hochwirdigen fu^ersten Bischof Albrechten ze Passaw vnd von demselben Gotshaus, denn die andern dritthalb lehen sint lehen von dem erwirdigen geistlichen herren Abt Fridreichen ze Melkch vnd von demselben Gotshaus. Denselben zehent allen wir ze chouffen gegeben haben Jörigen dem Floyt vnd seinen Erben vmb zwaihundert phunt vnd umb achtzig phunt wienner phenning, der si vns gantz vnd gar gewert haben, als ir Chaufbrief sagt, den sie von vns darumb habent, daz wir in darumb gelobt vnd verhaizzen haben, vnd verpinden ouch vns gegen in mit dem brief, daz wir in den vorgenanten zehent mit der egenanten Lehenherren, oder ob si nicht wêrn, darnach mit irer Nachkomen hannden, alsuil des von ir igleichem lehen ist, als vorbenant ist, aufgeben sülln, als lehens vnd Chaûfgu^ets recht ist vnd des Lanndes recht ze Osterreich, zwischen hinn vnd den weichnachten, die schierist cho^ement, an alles geuêr. Têten wir des nicht, wenne si vns denne nach derselben zeit monent vnd vodernt, so sol vnser igleicher einen erbern knecht selbandern mit zwain phêrten an allen aufschub vnd verziehen des nechsten tags darnach ze Newnburch Markchthalben in ein erber Gasthaus senden, wo si vns hin zaigent, vnd sulln die da innligen vnd laisten, als innligens vnd laistens recht ist, vnd da nimmer auschomen, vntz daz wir dem vorgenanten Jörigen dem Floit vnd seinen Erben den egenanten zehent allen mit der rechten lehenherren hannden aufgegeben haben in dem rechten, als vorgeschriben stet. Wer aber, daz wir in die laistung verzugen vnd also nicht laistieten, vnd in ouch den egenanten zehent also nicht aufgaeben, swas si des denn fu^erbas schaden nement, wie der schad genant ist, das ir ainer bei seinen trewn vngesworn gesprechen mag, denselben schaden sulln wir in allen ablegen vnd widerchern, vnd sulln in dennoch den egenanten zehent mit der rechten lehenherren hannden aufgeben, als vorgeschrieben stet, wenn si des nicht lenger enpern wellent. Tet wir des ouch nicht, so soll vns denn vnser herr der Hertzog in Osterreich, oder wer seinen gewalt hat, an alles fürbot vnd an alle chlag dartzu nätten vnd dem egenanten Jörigen dem Floyt vnd seinen Erben von allem vnserm gu^et, wo si darouf zaigent, phant antwu^ertten, so uerr, daz in alles das von vns wideruar vnd volfürt werd, das vorgeschriben stet, vnd daz in ouch alle die schaeden abgelegt werden, die sie des nement, als ouch vorbenant ist. Das lüben wir in alles stet ze haben vnd ze uolfürn mit vnsern trewn an alles geuer, vnd sulln ouch si das haben ouf vns vnuerschaidenleich vnd ouf allem vnserm Gut, daz wir haben in dem Lande ze Österreich, oder wo wir es haben, wir sein lebentig oder tod. Vnd darüber so geben wir in den brief zu einem warn vrchunde der sache versigilten mit vnsern Insigiln vnd mit der erbern Hannsen des Floyts von Sierndorf vnd Lienharts des Lymbtzer von Hebrestorf Insigiln, die si durich vnserr vleizzigen pet willen ze einer gezewgnuzz der sache an den brief gehangen habent, in an schaden. Der brief ist geben nach Christes geburt drewtzehenhundert Iar darnach in den sechs vnd sibentzgistem iar, an sand Johanns Tag ze Svnnebenden.

Source Fulltext: HAUSWIRTH, Schotten (=FRA II/18, 1859) S. 366-367