Ich Johannes, zu den zeyten pharrer zü Ekkchendorff in dem Langental, vergich offenbar an disem prif vnd tun chunt allen den, di in sehent oder hornt lesen, di nu sind oder hernach chunftig werdent, daz ich ainen Jartag alle iar ierleich schol begen an sand Katrein Tag oder des Suntags vor oder hinnach des Suntags an geuer, so ich schirist mag mitt zwain Messen, ob ich nicht mer mocht gehaben, zu ainer gedechnüzz der erbern Laut sel, Andree des Scharbarer vnd vraünt Elzbeten seiner hausfraun vnd Lepoltz pey dem Paungarten vnd ainer Perchten seiner hausfrawn vnd all irr chinder, wi di genant seln, vnd darczü aller irr vorvodern vnd gemainchleich alln gelaubigen sein zu hilff vnd zu Trost, wann diselben obgenant seligen Laüt czu dem egenanten Gotzhaus datz Ekkchendorff gechaufft vnd gemacht habent der ganczen gemain vnd chirch menig daselb, inzenemen vnd ze vechsen ain phunnt geltz wienner munis, daz gelegen ist zu Mägenstorff pey obern Holabrün zenachst, da zu den czeiten aufgesessen ist Jacob der Püchler, rechtz purchrechtz vnd also beschaidenleich, daz der czechmayster desselben Goczhaus des vorgenanten phunnt gelcz rechter inuechsner schol sein, funf schilling phenning miner zwayr phenning zu ainem ewigen liecht für sand Niclas alter in demselben Goczhaus, vnd drey schilling vnd zwen phennigen schol er mir oder meinn nachchomen raihen mitteinander zu vronampt auf den alter für oppher vnd für oblay, wann ich den Jartag begen, vnd nicht ee, nach des chaufpriefs sag, den di gemain hat daselb vber daz obgenant gut. Vnd schol auch denselben meinen prif andert nimant inn haben, wan der Czechmayster daselb an der ganczen gemainn stat. Vnd daz in das stet vnd vnczebrochen beleih, darvber gib ich in den prief versigilten mitt meinem anhangunden Insigel vnd mitt des erbern herren hern Wolfhartz, zu den czeiten pharrer zu Weirberkch, anhangunden Insigel, der der sach czeug ist mitt andern erbern Lauten genug, den di sach chund vnd gewizzen ist. Der prief ist gegeben, do man czalt von Christes gepurd dreuczehen hundert Jar darnach in dem Siben vnd Sibenczikistem Jar, des nachsten Freytags nach dem Ostertag.

Source Fulltext: HAUSWIRTH, Schotten (=FRA II/18, 1859) S. 371-372