Ich Hainreich von Hakenberch vergich fu^er mich vnd fu^er alle mein Erben vnd tu^en kunt offenleich mit dem brief allen den, die in lesent oder ho^erent lesen, di nu lebent vnd hernach ku^enftig sint, das ich mit aller meiner Erben gu^etem willen und gunst, mit wolbedachtem mu^et vnd nach rat meiner nechsten frewnt, zu der zeit, do ich es wol getun mocht, recht vndredleich verchoufft vnd geben han dem erbern Lazlaben dem Hering vnd vrown Johannen seiner hausurown vnd ir paider Erben meins rechten Erbs, das in den Satz ze Waltchuenschirichen nicht geho^eret, von erst meins rechten aigens den Perch gelegen ze Waltchuenschirichen, der do haizzet die Herbotsgrueb, mit gantzem Perchrecht vnd mit den Sedelphenningen, die dartzu^e geho^erent, vnd vier phunt vnd dreizzig phenning wienner mu^enzz geltes, gelegen auf der Mu^el niderhalb Waltchuenschirichen, vnd ist die nêchst Mu^el, vnd alles das Purchrecht, das dartzu^e geho^eret, vnd ainen weingarten, gelegen in der Herbotsgru^eb, vnd ein Holtz, das do haizzet das Prayttal, mit grunt mit alle, vnd ein Holtz, das do haizzet die Grueb, auch mit grunt mit alle, vnd ein Wys, gelegen ob dem haus ze Waltchuenschirichen, vnd fvmftzig phenning geltes, gelegen daselbens auf vrbaraekchern. Darnach mit meins Lehenherren hannt des hochwirdigen fu^ersten Byschof Albrechts ze Pazzaw meins rechten Lehens, das ich von im vnd demselben Gotshaus ze lehen gehabt han, halben zehent auf den weinga^erten, gelegen an dem vorgenanten Perg, der do haizzet die Herbortsgru^eb, vnd auf demselben Perg den zehent auf v^eberlentaekchern. Die vorgenanten Gu^eter allew vnd alles das, das dartzu^e geho^eret, es sei gestifft oder vngestifft, versu^echt oder vnuersu^echt, wie das genant ist, han ich dem vorgenanten Lazlaben dem Hêring vnd vrown Johannen seiner hausurown vnd ir paider Erben recht vnd redleich ze chouffen gegeben mit aller Zugeho^erung vnd mit allen den nu^etzen, Ern vnd rechten, als ich das aigen in aigens gewer vnd das Lehen in lehens gewer herpracht han, vmb Drithalbhundert phunt wienner phenning, der si mich gantz vnd gar verrichtet vnd gewert habent, also, daz si die vorgenanten Gu^eter mit aller zugeho^erung vnd mit allen nu^etzen, Ern vnd rechten, so vorgeschriben stet, su^ellen furbas ledichleich vnd vreyleichhaben vnd allen irn frumen damit schaffen, verchouffen, versetzen vnd geben, wem si wellen, an allen irrsal. Vnd sein auch wir, ich egenanter Hainreich von Hakenberch vnd alle mein Erben, vnuerschaidenleich der vorgenanten Gu^eter aller mit aller irer zugeho^erung, so vorbenant vnd vorschriben ist, des vorgenanten Lazlabs des Heˆrings vnd vrown Johannen seiner hausurown vnd ir paider Erben recht gewern vnd scherm fu^er alle ansprach des aigens, als aigens recht ist, des Lehens, als Lehens recht ist vnd des Landes recht ze O^esterreich. Wer aber, daz in an denselben Gu^etern icht abgieng mit recht, oder ob in icht chriegs oder ansprach daran ouferstuend, von wem das wêr, mit recht, swas si des schaden nernent, das su^ellen wir in alles ausrichten vnd widerchern an allen irn schaden, vnd sullen si das haben auf vns vnuerschaidenleich vnd auf allem vnserm gut, das wir haben in dem Lannde ze Österreich oder wo wir es haben, wir sein lebentig oder tod. Vnd daz der Chouf furbas also stêt vnd vntzebrochen beleib, daruber so gib ich obgenanter Hainreich von Hakenberch fu^er mich vnd fu^er alle mein Erben dem oftgenanten Lazlaben dem Hering vnd Johannen seiner hausurown vnd ir paider Erben den brief zu einem warn vrchund der Sach versigilten mit meinem angehangem insigil vnd mit meins Swagers Insigil hern Albrechts des Stu^ochsen von Trawtmanstorf vnd mit meins O^ehems Insigil Albers von Ottenstain des Jungen, die zeit des hochgeborn fu^ersten hertzog Albrechts ze Osterreich Schenkch, vnd mit Chadolts insigil von Weˆhing vnd mit Jorigen insigil des Dozzen von Hagendorf, die der Sach getzeugen sint mit irn angehangen insigiln. Der brief ist geben nach Christes gepu^ert Drewtzehen hundert iar darnach in dem Syben vnd Sybentzgistem iar, an sand Mathie tag des heiligen zwelifpoten.

Source Fulltext: HAUSWIRTH, Schotten (=FRA II/18, 1859) S. 369-371