Ich Pernhart der Weydner vergich mitsamt allen mein Erben vnd tu^en chunt offenlich mit dem brief, daz ich gelten schol dem erbern chnecht Hansen von Hetzmastorf vnd vrown Annen, seiner hausvrown, vnd allen irn erben zwelifthalb phunt wyenner phenning, der wir sew oder, swer vns mant mit dem prief, vnuertzogenlich wern vnd richten suln, zway phunt an sand Johanstag zu svnnbenten, der nv schirist chumpt, vnd di zehenthalb phunt wienner phenning an sand Michelstag, der darnach schirist chumpt, vnd zu^e welichem egenanten tag wir des nicht tu^en, waz sev dann desselben fu^er die egenanten teg schaden nement hintz Christen oder hintz iuden oder swie der schaden genant wer, den sev an chlag vnd an fu^erbot vnd auch vngeswarn ir ainer pei sein trewn gesprechen mag, denselben schaden mitsamt dem houbtgu^et schul wir in allen abtragen vnd widerchern an allen irn schaden vnd an alle ir mu^e. Daz lob wir in mitsamd allen vnsern erben vnuerschaydenlich, also stet ze haben vnd zu laisten mit vnsern trewn in, oder swer vns mant mit dem prief, vnd sev suln auch dazselb haben auf vns vnuerschaidenlich vnd auf allem vnserm gut, daz wir haben, swa wir daz haben, ez sei erib oder varunt gu^et, wir sein lemtig oder tod. Mit vrchunt ditz prief, den wir in darvber geben zu^e einem offen vrchunt der warhait der sach versigelten mit vnserm anhangunden insigl vnd mit vnsers gu^eten freunt Fridreichs von Straiffing anhangunden insigl, den wir fleizzichlich dar gebeten haben, daz er der sah also zeug ist mit seinem insigel, in an schaden. Der prief ist geben nach Christes gepurd drewzechen hundert iar vnd darnach in dem fumff vnd achtzigisten iar, an dem heiligen pfingstabent.

Source Fulltext: HAUSWIRTH, Schotten (=FRA II/18, 1859) S. 403-404