Georius, dei et apostolice sedis gracia episcopus Patauiensis, dilecto in Christo Georio dicto Turtendorffer, presbytero conmendatori ecclesie beate Marie virginis in Zeldendorf nostre diocesis, salutem in domino. Oblata nobis tua peticio continebat, quod, cum venerabiles et dilecti in Christo, Donaldus tunc abbas et conuentus monasterii Scotorum Wienne dicte nostre diocesis, fructus, redditus et prouentus eiusdem ecclesie in Zelderndorf, ad ipsos et idem eorum monasterium pertinentes, sub certis modis et condicionibus ad certos annos tibi locauerint, prout in litteris eorundem abbatis et conuentus ipsorum sigillis sigillatis inde confectis lacius dinoscitur contineri, quatenus locacionem eandem approbare et confirmare auctoritate ordinaria dignaremur, nos votis iusta petencium fauorabiliter annuentes locacionem predictam cum suis modis et condicionibus appositis, prout prouide facta est, approbamus nec non dicta auctoritate ordinaria confirmamus, tibi nichilominus curam animarum ac administra cionem spiritualium et temporalium ipsius ecclesie in Zelderndorf pro memoratis annis tenore presencium committentes. Datum in opido nostro ad Sanctum Ypolitum die XVI^a. mensis Octobris, anno domini millesimo trecentesimo nonagesimo secundo.

Source Fulltext: HAUSWIRTH, Schotten (=FRA II/18, 1859) S. 434-435