Wir Wilhalm vnd Albrecht, Vettern, von Gotes gnaden Hertzogen ze O^esterreich, ze Steyr, ze Kernden vnd ze Krain, Grafen ze Tyrol etc. Bechennen fur vns, vnser Erben vnd nachkommen vmb vnser Vest ze Walkerskirchen mit aller irr zugehörung, die vnserm getrewn Lezlein dem Hering fur viertzehen hundert phunt phenning yetzunt in phandes weis steet nach seiner phandbrief sag, die er darumb hat, Daz wir angesehen haben die getrewn vnd willigen dienste, so derselb Hering vnsern vordern seligen vnd auch vns vntzher lang zeit getan hat vnd auch noch furbazz wol getun mag vnd sol, vnd haben dadurch im vnd seinen eleichen Leibeserben von sundern gnaden vnd von furstleicher macht, die egenant vnser Vest vnd herschaft ze Walkerskirchen mitsampt allen iren Eren, wirden, Leuten, Gütern, Gerichten, Vogteyen, nutzen, gülten vnd aller anderr irr zugehörung zu ainem rechten freym Lehen gegeben vnd verlihen, geben vnd verleihen in auch die wissentleich mit Kraft ditz briefs also, daz derselb Hering vnd sein eleich Leibeserben, das sun sind, dieselb vnser vest vnd herschaft mit aller zugehörung, als dauor steet geschriben, sullen nu furbazz ewikleich in ains rechten Lehens weis||
ynnhabrn, besitzen vnd niessen, vnd auch die von vns, vnsern Erben vnd nachkomen stettikleich ze lehen empfahen, alz offt das zu schulden kumpt, vnd vns auch damit wider allermenikleichen getrew, beygestendig vnd gewertig sein, als Lehensmann irem Lehenherren ze recht gebunden sind vnd als solcher Lehen vnd Landes recht ist ane geuerde. Mit vrchund ditz briefs. Geben ze Wienn an Mentag nach dem Suntag, als man singet Letare in der Vasten, nach Christi gepurd drewtzehenhundert Jar darnach in dem Siben vnd newntzigistem Jare.

Source Fulltext: HAUSWIRTH, Schotten (=FRA II/18, 1859) S. 453-454