Ich Kaspar der Ladendorffer vnd all mein Erben vergehen vnd tun chunt offenleich mit dem brieff, daz sich die erbern geistleichen herren vnser frawn prueder vnd der Conuent Gemain zu Wienn dez ordens von dem Perg Carmelio mit vns Trewleich vnd frewntleich geebent vnd vericht haben vmb den hoff gelegen zu Ladendorff in dem winchel zunachst dem Hosennestel also weschaidenleich, daz wir, ich vorgenanter Kaspar der Ladendorffer vnd all mein Erben, von desselben hoffs wegen hincz den vorgenanten geistlichen herren vnd hincz allen irn nachkomen von dem heutigen Tag, als der brieff geben ist, vnd hinffür ewichleich chain ansprach noch vodrung haben noch gewunnen süllen, weder vmb vil noch vmb wenig, mit recht noch an recht, wan wir vns dez vorgenanten hoffs mit aller seiner zuegehörung gaenczleich verczigen vnd fürczicht tan haben. Vnd daz daz also staet vnd vnczerbrochen weleib vnd darüber so gib ich in obgenanter Caspar der Ladendorffer für mich vnd all mein Erben den brieff den vorgenanten geistleichen herren zu einem offem vrchund vnd warn zewgen der sach versiglt mit meinem angehangen Insigl. Der brieff ist geben zu Wienn, do man zalt nach christi gepurd drewczehen hundert Jar darnach in dem acht vnd newnczigistem Jar, des nachsten Freytags nach der heiligen dreyr chünig Tag.

Source Fulltext: HAUSWIRTH, Schotten (=FRA II/18, 1859) S. 455-456