Wir Albrecht von gotes gnaden Herczog ze Osterreich, ze Steyr, ze Kernden vnd ze Krain, Graf ze Tyrol etc. Bechennen, daz fur vns kame vnser getrewr Hanns der Floyt vnd gab vns auf die Vest ze Streitdorff, den Mairhof vnd ain Viertail zehents daselbs vnd ain Peuntwisen vnd drei fleischtisch zu Nidern Velebrunn mit iren zügehörungen vnd bat vns vleissicleichen, daz wir die verleihen geruchten vnsern getrewn Tybolten vnd Hannsen den Floyten seinn Vettern, wan die ze Lehen von vns wern, vnd auch dieselben sein Vettern die von im kauft hieten. Das haben wir getan vnd haben denselben Tybolten vnd Hannsen den Floyten die vorgenanten Lehen mit ihren zügehörungen verlihen vnd leihen auch wissentleich mit dem brief, was wir in daran ze recht verleihen sullen oder mugen, also, daz sy vnd ir Erben die nu furbazzer von vns vnd vnsern Erben in Lehens weis ynne haben vnd niessen sullen vnd mugen, als Lehens vnd Landes Recht ist, vngeuerleich. Mit vrkund dicz briefs. Geben ze Wienn an Phincztag vor dem Suntag Oculi in der Vasten, nach Kristi gepurt dreuczehenhundert Jar darnach in dem Newn vnd neunczigistem Jare.

Source Fulltext: HAUSWIRTH, Schotten (=FRA II/18, 1859) S. 466-467