Ich Toman der Nuesner, Purger ze Wienn, vnd ich Margret sein Hausfraw vnd all vnser Erben wir vergehen vnd tun kund allen den, die den brief lesent oder hörent lesen, die nu lebent vnd hernach kunftig sind, das wir mit gütem willen vnd mit wolbedachtem müt, zü der zeyt, da wir es wol getun mochten, vns verczigen vnd furczicht getan haben vnd verczeyhen vns auch recht vnd redleich mit dem brief gegen den erbern herren hern Berichtolten dem Awer, die czeyt Chapplan sand Pangretzen Kappellen gelegen an der herczogen hof ze Wienn, ayns hewsleins, gelegen daselbs an dem hof ze nechst Jörgen dem Pretnagel. Vnd darumb hat vns derselb her Perichtolt gegeben Sechczehen phunt phenning wienner Münzz, der wir von im gancz vnd gar gewert sein, also beschaydenleich, daz dasselb hewsel pey der vorgenanten sand Pangretzen Kappellen hinfur ewikleich beleyben vnd dauon nymermer enphrömdet werden sol, als ander gült vnd güter, die dartzü gehörent, eynem ygleichen Chapplan derselben Kappellen inneczehaben vnd ze nyessen, das wir noch vnser erben, noch nyemant von vnsern wegen fürbas auf das egenant hewsel nymermer chayn ansprach, Vordrung noch Recht haben noch gewynnen süllen, weder vil noch wenyg, mit worten noch mit werichen, in chaynerlay weys angeuer, wann wir desselben hewsleins gütleich vnd willichleich der egenanten Kappellen abgetreten vnd ledig lassen haben. Vnd das auch die obgeschriben hanndlung hynfür also stet vnd vnuerrukcht beleyb, vnd wir auch selber nicht aygen Insigil haben, darüber zu eynem warn sichtigen vrchund geben wir den brief, versigilten mit der zwayr erbern Mann Insigiln Michels dez Menscheyns und Jacobs des Gruenn, bayd purger ze Wienn, die wir darumb vleizzleich haben gepeten, das sy irew insigil zu geczewgnüzz der vorgeschoben hanndlung an den brief gehangen habent, in an schaden, darunder wir vns mit vnsern trewn an geuer verpinden, alles das stêt ze haben, das vorgeschriben stet an dem brief, der geben ist, da man zalt von Christi gepurd Vierczehenhundert Jar darnach in dem funften Jar, des Phyncztags in den Vier Tagen in der Vassten.

Source Fulltext: HAUSWIRTH, Schotten (=FRA II/18, 1859) S. 494-495