Ich Peter der Angeruelder, zu den zeiten Statrichter ze Wienn, vergich offenleich mit dem brief, daz für mich kom in die purgerschrann ze Wienn, do ich sas an offem gericht, Mathes Lewssinger vnd chlagt mit vorsprechen auf ein übertewrung auf Andres des Pernger vnd seiner hausfrawn Cecilien haws, gelegen in der Suengerstrozz ze Wienn zenegst Lewpolts Haws des Rekkinger, vber die geltschuld vnd daz purkrecht, so emalen darauf leyt, vmb achtzehenthalb phunt vnd Syben pfenning wiener Münnz, die si im baidew vnuerschaidenleich gelten solten, vnd dafür si im die vorgenant v¨bertewrung mit gesampter hant ze phant hieten gesatzt, als es in der herren datz den Schotten Satzpuch ze einer gedechtnuzz geschriben stund. Vnd chlagt nach desselben Satzpuchs sag alsuerr, vntz er nach allen fürboten vnd ze wissentun die vorgenante vbertewrung mit rechten nottayding erlangt vnd behabt vor offem gericht. Da ward gefragt, was recht wêr. Da geuiel mit frag vnd mit vrtail, mir solt der vorgenant Mathes der Lewssinger mein recht geben, das hat er getan, vnd solt ich in der egenanten vbertewrung, seins phants, gentzleich gewaltig machen vnd an die gewer setzen. Das han ich auch getan also, das er mit derselben vbertewrung fürbas allen seinen frumen schaffen sol vnd mag, mit verchawffen oder mit versetzen, wem er well, an allen irrsal, souerr, daz er des obgenanten seins gelts alles gantz vnd gar dauon verrichtet vnd gewert werde, vnd solt ich im des mein vrkunt geben. Vnd des ze vrkund so gib ich im den brief versigilten mit meinem insigil. Der brief ist geben ze Wienn nach Kristi gepurd Viertzehenhundert Jar darnach in dem fvmften Jar, des negsten Montags nach sand Lucie tag.

Source Fulltext: HAUSWIRTH, Schotten (=FRA II/18, 1859) S. 495-496