Ich Michel der Genspayndl in der Lantstrazz vor Stubentor ze Wienn vergich vnd tun kund allen den, die den brif lesent oder horent lesen, die nu lebend vnd hernach kunftig sind, das ich mit aller meiner erben gutem willen vnd gunst vnd mit wolbedachtem mut zu der zeit, do ich es wol getun mocht, vnd mit des erbern mannes hant Niklas des Fluscharts, zu den zeiten Amptman der geistleichen frawn Chloster ze Pulgarn, von des edln herren wegen hern Eberharts seligen von Kappellen, der desselben Klosters stiffter vnd vogt gewesen ist, verchaufft hab meins rechten Kaufguts mein Mül, gelegen ze Gumppendorff auf den grunt, der die gemayn ze Gumppendorf angehort vnd haisset die Chutermül, vnd den Weyr daran vnd swas dartzu gehoret, ze veld vnd ze dorff, wie das genant ist, da man allew Jar dauon dint den geistleichen frawen ze Pulgarn ayn phunt wienner phenning ze Gruntrecht vnd nicht mer. Diselben Mül vnd den Weyr daran vnd swas dartzu gehoret haben wir recht vnd redleich verchaufft vnd geben mit allen den nützen vnd rechten, als ich si vnuersprochenleich in gruntrechts gewer herbracht hab vnd als sy mit alter herchomen ist, vmb zway hundert phunt vnd zwainczig phunt wienner phenning, der ich gantz vnd gar verrichtet vnd gewert pin, dem erbern mann Hannsen dem Chulppenmaister, purger ze Wienn, frawn Kunigunden seiner hausfrawn vnd ir bayder erben, furbas ledichleichen vnd freileichen ze haben vnd allen im frumen damit ze schaffen, verchauffen, verseczen vnd geben, wem sy wellen, an allen irrsal. Vnd pin auch ich vorgenanter Michel der Genspayndl mitsambt meinen erben vnuerschaidenleich der egenanten Mül, des Weyer daran vnd swas dartzu gehoret, als vorgeschriben stet, des vorgenanten Hannsen des Chulpenmaister, frawn Kunigunden seiner hausfrawn vnd ir bayder erben rechter gewer vnd scherm für allew ansprach, als gruntrechts recht ist vnd des lanndes recht ze Osterreich. Wer aber, das in fürbas an derselben Mül, dem Weyr vnd swas dartzu gehöret, icht krig oder ansprach auferstund, von swem das wêr, mit recht, das sullen wir in alles ausrichten vnd widerchern an allen irn schaden. Vnd sullen auch sy das haben auf vns vnuerschaidenleich vnd auf allem vnserm gut, das wir haben in dem Lande ze Österreich oder wo wir es haben, wir sein lebentig oder tod. Vnd das der chauf furbas also stët vnd vnczebrochen beleib, vnd wann ich selber aigen Insigil nicht hab, darüber so gib ich fur mich vnd fur all mein erben in den brif ze einem warn offem vrkund vnd ewiger vestnung der sach versigilten mit des Amptmans Insigil des vorgenanten Niklas des Fluscharts vnd mit des erbern mannes Insigil Pauln des Wurffels, purger ze Wienn, den ich des vleizzichlich gebeten hab, das er der sach geczeuge ist mit seinem anhangunden Insigil, im an schaden darunder ich mich verpind mit meinen trewn an geuer, alles das stët cze haben, das vor an den brif geschriben stet, der geben ist ze Wienn am Sambstag vor Oculi in der vasten, nach Kristi gpburde virczehenhundert Jar darnach in dem Sibenten Jar.

Source Fulltext: HAUSWIRTH, Schotten (=FRA II/18, 1859) S. 497-499