In nomini domini amen. Anno natiuitatis eiusdem millesimo quadringentesimo VII., indictione quintadecima, die vero dominica sedecima (sic, recte septima decima) mensis Aprilis, hora vesperorum uel quasi, pontificatus beatissimi in Christo patris et domini nostri domini Gregorii diuina prouidencia pape duodecimi anno eius primo, in mei notarii publici testiumque subscriptorum presencia personaliter constitutus, utpote coram generoso domino domino Johanne, sacrosancti Romani imperii Burggrafio de Meydburg, comes in Hardekka, et coram nobili viro domino Mathia Roerer nec non coram Wolfhardo Haslawer nobili domino et sapienti viro Vlrico Lewttakker, pro tunc rectore curie prefati generosi domini de Meydburg, Martino, rectore scolarum ibidem in Pulka, laycis Patauiensis diocesis, et coram discreto viro domino Petro, multe honestatis rectore cappelle sacri rosei sanquinis in Pulka, domino Laurentio, pro tunc socio diuinorum parrochialis ecclesie in Pulka, domino Nicolao, cappellano sancti Wolfgangi cappelle ibidem in Pulka, prespiteris Pat. dioc, quod quidam laycus Johannes Strendorfer Pat. dioc. veniens coram magna multitudine populi cum quadam cistula ante maius altare prescripte cappelle, monstrans aliquas partes, quas asseruit esse reliquias, de et super hiis omni jure, forma, quibus melius et efficacius debuit et ut moris est, jurauit in animam suam juramento prestito ad sancta ewangelia, illas partes monstratas fore reliquias veras, perfectas, bene probatas nec aliquo modo suspectas, fide indubitabiles, in quantum sibi constat, ymo multis hominibus tam masculini quam feminini sexus has partes aspicientibus verosimile et fuit indubitabile, quin essent vere, perfecte, bene probate. Nichilominus prefatus Johannes Strendorfer, laycus Pat. dioc., parumper post iuramenti prestacionem ueniens ad me publicum notarium coram fidedignis personis antefatis ob firmiorem fidei plenitudinem et sui confidenciam clariorem et tuciorem, asserens, se in pluri ad hoc facturum quolibet tempore in futuro, in quantum suppeteret, corpore et anima, qualitercumque congruerit aut quolibet requisitus fuerit, quibus interest, intererit ac interesse poterit, legaliter et canonice ad hoc deputatis, qui quidem Johannes prefatus Strendorfer donauit et dedit, ut prefertur, reliquias has sana et premiditata mente, libere et spontanea bona voluntate, dumtaxat causa dei et sacri rosei sanquinis ob reuerenciam, ad hanc cappellam prescriptam, circumscripta omni fallacia et fara, quibus symoniaca prauitas induceretur seu quodcumque huiusmodi aliud vicium criminale. Presertim illis omnibus non obstantibus generosus noster dominus Johannes, sacrosancti Romani imperii burggrafius de Meydburg, comes in Hardekka, nolens, nonnullum bonum fore irremuneratnm, nec non quod sibi vel honori suo vergere ad detrimentum possit aliquo modo, requirens me publicum notarium publice protestari et profiteri, quod sibi pro tunc promisit verbotenus subuenire et eum iuuare ad dignitates personatus seu ad aliquod huiusmodi tale, quod suum statum concernit, nam volens fugere symoniacam prauitatem et solum animaduertens suum magnum laborem ac diligentem custodiam, ut prefertur, circa easdem reliquias et bone voluntatis propositum, ut pro tunc verbis bonis proposuit, ymo verius, ne ex post errores nouissimi fierent peyores primis, et aliquod dubeitatis prorsus redundaret, illustris noster dominus prefatus de Meydburg intendit rimari vlteriori probatione illarum parcium, quas multiformiter antefatus Johannes Strendorfer iurauit esse reliquias, et secundum dictamen mandatumque venerabilis patris et domini nostri domini Georii episcopi Patauiensis has probaciones prosequi tempore oportuno, ut moris est, et iuxta solempnitatem juris. Super quibus omnibus et singulis dictus Nicolaus Gawster, pro tunc victricus ecclesie seu cappelle in Pulka, peciit, me publicum notarium vnum uel plura confici instrumentum instrumenta. Acta sunt hec in Pulka Pat. dioc. in cappella sacri rosei sanquinis ante maius altare, anno, indictione, die, mense, hora et pontificatus, quibus supra, presentibus ibidem honorabilibus et discretis viris dominis fidedignis testibus prenominatis superius. Feci aliquas rasuras, ut patet inspicienti.||
||
Signum||
Notarii.||
||
Et ego Wilhelmus Reynstein, clericus Herpipolensis diocesis, imperiali auctoritate publicus notarius supradictus, predicto juramento, promissioni, ratisfactioni ac omnibus aliis et singulis, dum sic, ut premittitur, agerentur et fierent, vnacum prenominatis testibus presens interfui et ea, que vidi et audiui, propria manu mea scripsi et in hanc publicam formam redegi, signo meoque nomine solito signaui, rogatus et requisitus in testimonium omnium premissorum.

Source Fulltext: HAUSWIRTH, Schotten (=FRA II/18, 1859) S. 499-501