In nomine sancte et indiuidue Trinitatis. Leupoldus dei gratia dux Austrie ac styrie. uniuersis Christi fidelibus tam presentibus quam futuris salutem in perpetuum. Quia omnis potestas est a deo. qui pius est et iustus. nos et omnes. qui ab ipso maiorem inter homines potestatem accepimus. ipsum recognoscere et ad eum respicere magnopere||
debemus. ut in ipso et per ipsum iusticiam et misericordiam conseruantes. eius semper muniamur auxilio. et ab eo nunquam inperpetuum separemur. Quapropter et nos. et omnes parentes nostri. ut omnium peccatorum nostrorum remissionem ab omnipotenti deo consequamur. decimationes aput Sunnilpurch fratribus de Sitanstetin iam diu iniuste ablatas. eidem monasterio deuota mente restituentes. longam iniuriam ad equitatem reuocare curauimus. et propter uenerabilem eiusdem loci abbatem omnia. que uel nos uel parentes nostri eidem ecclesie contulimus. capellam scilicet aput Rebegowe. et fodrum. quod de bonis ipsorum habere possemus. et ut bona ipsorum siue per terram. siue per aquam sine omni thelonei exactione liberum habeant transitum. et ut omnes quoque ministeriales nostri bona sua pro peccatis suis nostra permissione et licentia eidem monasterio libere contradant. Hec inquam omnia iure perpetuo iam dicte ecclesie indulsimus. et larga manu donauimus. et ne inposterum alicuius astucia uel malicia hec nostra donatio possit infringi uel deleri. uniuersa hec in carta describi. et sigilli nostri inpressione muniri precepimus. et ut inperpetuum rata et inconuulsa permaneat. omnes quorum nomina subiuncta sunt. in testimonium illis adhibuimus. Crafto de Amcinspach. Vlricus de Pernecche. Hademarus de Chunringen. Wichardus de Cebingen. Gundacher de Styre. et frater eius Duringus. Ulricus struno. Vlricus de Pecha et alii quam plures. Datum aput Newenburch anno incarnat. domini M.° CC.° Indictione VI^a.

Source Fulltext: RAAB, Seitenstetten (=FRA II/33, Wien 1870) S. 31-32