Anno Domini MCCLXVIIII. Id. Novembr. Nos E. prepositus s. Ypoliti litteras venerabilis Patris nostri P. Patauiensis episcopi recepimus in hec verba. P. dei gratia ecclesie patavien. episcopus. dilecto in Christo fratri. E. venerabili preposito s. Ypoliti. cum salute sinceram in domino charitatem. Conquestus est nobis dilectus in Christo filius. Otto plebanus ecclesie s. Martini in Mulbach, quod viri religiosi. abbas et conventus in Sitensteten ipsum capella in Eisarn, que sita est in terminis eiusdem ecclesie. contra deum et justitiam spoliarunt. prout in autentico plenius continetur. Nos igitur mandatis huiusmodi optemperare volentes. ad instantiam actoris dicti scripsimus venerabili viro . . . abbati et priori in Gersten, in hec verba. Predilecto in Christo patri et domino speciali. venerabili abbati et priori in Gersten. E. dei gratia prepositus s. Ypoliti cum devotis orationibus. quitquit poterit obsequi et honoris. Litteras reverendi in Christo patris et domini nostri P. venerabilis pataviensis episcopi nos recepisse noveritis in hec verba P. dei gratia etc. ut est in nostris litteris mandatum citatorium expressum. Qui scilicet abbas et prior quod nostris. immo domini episcopi mandatis paruerint. sub sigillo suo. nobis in hec verba rescribere curarunt. significantes nobis. quod citauerint prefatum dominum abbatem et Conventum de Sitensteten hoc modo. Reverendo in Christo patri et domino E. venerabili preposito s. Ypoliti. F. dei gratia ecclesie Gerstensis Abbas et prior eiusdem Cenobii cum obsequio devoto caritatis affectum. Post recepcionem litterarum vestrarum nobis iniungencium etc. ut est in littera eorundem. Presidentes itaque sequenti die post octavam epiphanie domini. ut in litteris superius iniciatis plenius continetur. in parochia Chrems dicto Ottone per se comparente. Alexander et Otto monachus procuratorium exhibuerunt. Unde assessores nobis de uoluntate parcium assumsimus dominum decanum de Chremsa. Magistrum Theodericum de polan. fratrem bonifaeium iuratum quoque tabellionem G. clericum nostrum. sicque iudicio firmato post altercaciones hinc et inde factas. legi coram nobis ipsum procuratorium fecimus in hec verba.||
Karissimo in Christo patri ac domino E. uenerabili preposito S. Ypoliti. qui se gerit pro iudice a domino Pataviensi episcopo constituto. R. miseracione divina (abbas) totusque conventus Monasterii de Sitensteten. devotas orationes in domino jesu Christo. Noveritis. quod in causa vel in causis. quam vel quas movet vel movere intendit contra nos auctoritate domini nostri Pataviensis episcopi coram vobis Otto plebanus de Mulbach super capella in elsarn et suis attinentiis universis. Ottonem monachum confratrem monasterii nostri et Alexandrum notarium nostrum exhibitores presencium nostros constituimus procuratores. quantum ad proximum diem sequentem post octauam epiphanie. ad quem noscimini nos citasse in Chremsam. vel eiusdem diei continuacionem. si fuerit continuata. dantes eisdem O. et A. potestatem generalem et liberam pro nobis agendi. respondendi. defendendi. excipiendi. replicandi. transigendi. litem contestandi. iurandi de calumnia sive de veritate dicenda. et subeundi in animas nostras cuiuslibet generis sacramentum. insuper testes et instrumenta producendi. et si necesse fuerit. appellandi. ac pro nobis omnia faciendi. que nos ipsi faceremus. si personaliter adessemus. et possunt et debent ueri et legitimi procuratores facere. et in quibuscunque mandatum exigitur speciale. Ratum et gratum insuper nos semper promittimus habituros. quitquit predicti O. et A. quantum ad dictum diem uice et nomine monasterii nostri faciendum. seu etiam ordinandum duxerint in premissis omnibus uel quolibet premissorum. et hoc omnibus, quorum interest. per presentes litteras uolumus esse notum. Datum in Sitensteten. anno domini MCCLXVIIII. die S. Antonii heremite.||
Ad quod procuratorium pars actoris de insufficientia arguendo dicebat. quod procuratorium reorum. quod insufficientia aliquo modo redarguit non ualeret. sed quia clausula de iudicato soluendo non erat ei inserta. ergo insufficiens. nos uero de||
assessorum consilio fecimus procuratores dictos prestare sacramentum corporale in animas dicti abbatis et conuentus in suplementum procuratorii de iudicato soluendo. Hoc facto actor libellum in hec uerba porrexit. Coram uobis domino eberhardo. uenerabilii preposito S. ypoliti a domino meo P. uenerabili Patauiensis ecclesie episcopo iudice delegato. Ego Otto plebanus ecclesie S. Martini de Mulbach conquerendo propono. quod dominus abbas et conuentus de Sitensteten me capella de elsarn cum suis attinenciis contra iustitiam spoliarunt. quendam confratrem suum instituentes motu proprio in eadem. Quare peto mihi dictam capellam et possessionem ipsius sententialiter restitui cum attinenciis uniuersis et cum fructibus perceptis. et qui percipi potuissent per me si mihi fuisset eosdem licitum possidere. Peto etiam mihi dictum abbatem et conuentum ad expensas et interesse, que omnia estimo ad summam XL librarum sententialiter condempnari. Saluo iure etc. Quo audito dicti procuratores copiam libelli sibi fieri petierunt. Quo porrecto per iudicem eisdem petierunt inducias deliberandi. Contradicente quoque actore multis racionibus inducias deliberatorias eis negari debere. presertim. cum per alios pridem iudices ad hoc citati abbas et conuentus dicti per biennium et amplius poterant sufficiencius certificari. et ideo non debebant cerciorari. Nos itaque communicato assessorum et peritorum consilio. ne delusorium uideretur nostrum iudicium. ex equitate sumus interlocuti. dantes eis terminum sextam feriam hora tertia ante dominicam Inuocauit peremtorium ad eundem locum coram nobis ad respondendum libello uel cedendum. interueniente quacumque specie composicionis. Ad hec scribendum. acta formandum partes ad nostrum hospicium uocauimus pro sequenti die. ubi procuratores dictorum abbatis et conuentus renisi contradixerunt dicte interlocutorie. petentes. quod insereretur solum hoc. scilicet ad deliberandum. quod pars actoris contradixit. asserens. quod nichil esset immutandum eorum. que in iudicio coram partibus publice essent acta. Nos ex superhabundanti partibus damus eundem terminum ad procedendum in causa, quantum de iure fuerit procedendum. Acta sequenti die scilicet feria quarta post octauam epiphanie.

Source Fulltext: RAAB, Seitenstetten (=FRA II/33, Wien 1870) S. 88-91