Ich Chunrat, von Gotez gnaden apt ze Seytensteten, tuen chunde allen den, di disen prief an sehent, horent oder lesent, Daz her Hainreich van wasen den hof in der awe, vnd die mule, di er paidev van mir vnd meinem Gotzhauz ze rechtem lehen hot, seiner hauzvrowen gesatzet hot, vern Gedrauten mit meiner hant, vor sehczge pfunt wienner pfenning, also, ob er nicht ist, so schulten sein chinde di selben Satzung van vern Gedrauten losen, vnd schol di selbe losung geschehen zwischen weinachten vnd vaschanch, vnd vber di selben Satzung hot her hainreich van wasen seiner hauzvrowen. vern Gedrauten diesen prief gegeben ze ainem urchunde, vnd ist der selbe prief pestetiget mit meinem ynsigel, vnd sint dez zevg, her vlreich van dem Stain, Her Herweig van dem Holtze, her wecil van Erbing, her vlreich van Mitterberch, Her Levtolt van Mitterberch, her Marchart van Osterberch, her Hainreich der Streler, her Hainreich van horawe, Hainreich van winthag, vreitil van winthag, Ludweich von Samerdorf, Chunrat der Stainer vnd ander manne vil. vnd ist daz geschehen noch Christ puerde, vber Tausent jar, zwai hundert jar, vnd vier vnd Neuntzge jar. an sant Bartholomei tag.

Source Fulltext: RAAB, Seitenstetten (=FRA II/33, Wien 1870) Nr. 113