Ich Ott van Cinzendorf vergich offenwar, vnd tuen chunt allen den, die disen prief sehent, oder horent lesen di nv sint oder hernach chvnftig werdent. Daz ich mit wol verdachtem||
muet, vnd mit guetleichem willen meiner erben di sechs lehen, di also wenant sint, ain lehen auf der zokelsawe. ainz am Wagenhof, ainz datz Reut, ainz datz vlreichen, datz hintterperig, ainz im Stokchech. vnd ainz datz dem Gizzubel. vnser vrowen gotshaus datz Seytensteten Ledigleich an allen chrieg vnd an alle ansprach, nach meinem tot auf gegeben han, also, daz igleichez lehen, die weil ich leb, elle iar an vnser vrowen tag ze dienst zeit shol ze zeug vnd ze vrchund hintz Seytensteten fumf phenning dienen, vnd zehant. swann ich nimer pin, so shol mein herre der abt vnd deu Samnung gemain datz seytensteten sich der selben sechs lehen mit leuten vnd mit guet, vnd mit allem dem, daz darzue gehoret — ze velde vnd ze holtz, vnd mit allem zehent, wesuecht vnd vnwesuecht, ze rechtter aigenschaft ledichleich vntterwinden, mit aller meiner erben guetleichem willen, vnd an all ansprach, vnd ist daz darumb geschehen Daz mein herre. ze der Zeit abt Hainreich vnd deu Samnung gemain vnser vrowen gotshaus datz Seytensteten daz verlihen guet, daz ich in lehens gewer vnd mit lehens recht vntz her van ierem gotshaus ze rechtem lehen gehabet han, Daz in ierem luzzen pej ybsitz leit, als seu in ieren alten hantuesten van ierem Stifter habent, Daz seu daz mit ierem guetleichen willen meinem aydem, Otten van Traun, vnd meinen eninchlein Otten vnd weichharten van Cinzendorf, vnd allen ieren erben, paideu Svn vnd dochtern — ze rechtem Lehen gelihen habent, vnd daz dev red stet vnd vnzeprochen weleib gib ich Ott van Cinzendorf meinem herren dem abt vnd seiner samnung datz Seitensteten disen prief ze vrchund, vnd ze einem ewigen gezeug. westetigten mit meinem hangunden Insigil, vnd mit meines aydems Otten van traun hangunden Insigel, vnd mit hern Hainreiches van volchenstorf hangundem Insigel, vnd mit hern Gundachers des alten van Losenstayn hangundem Insigel. Des sint gezeug die erbern herren. Her Eberhart vnd her Hainreich van walsse, her Ott vnd her Ludweig van Celking, her Gundaker der Jung van Losenstayn vnd sein prueder der Perchtolt, her Ott vam wasen, Alram van Reichkerstorf, Herman van Nevnwerch, Dietreich van Erbing, vnd ander piderwe leut genueg, Daz ist geschehen datz Seytensteten. do van Christes gepuert ergangen waren Tausent iar. Dreu hundert iar. vnd darnach in dem Sechzehenten iar. An sant veites tag.

Source Fulltext: RAAB, Seitenstetten (=FRA II/33, Wien 1870) S. 160-161