Ich Weigman purger ze ybs, vnd ich Jevt sein havsvraw, vergehen vnd tuen kunt allen den, di disen prief lesent oder horent lesen, di nu lebent vnd hernach chumftich sint. Daz wir mit guetem rat, vnd mit wol verdachtem muet, vnd mit guetem willen vnser tochter vraven Gerdravten vnd aller vnser gerben, vnsern weingarten, der da leit ze Rehperch an dem Lintberge, haben gegeben noch vnser beyder tot hintz dem Chloster ze Seytteinsteten den herren, vnd vnser vrawen zu lob vnd zu ere, vnd vnsern selen zu eynem ebygem hayl, vnd vnsern Ohem hern Nyclaen zu eyner vurdrunge, ledichleichen an alle ansprach. Vnd dez sein gezevgc, her Symon der Richter ze ybs, vnd sein Bruder her Tyetreich, her Jans vnd vnser eydem her Peter, her Reycher, her Herman vnter den Tyschen, vnd ander Byderbe leut genuch. Daz dy geschieht stet sey. vnd jmmer ewichleichen vnzerbrochen beleib. Dar vber geb wir den vorgenanten herren ze Seyttensteten dysen prief. versigelt mit vnserm anhangvndern Insigel. Dyser prief ist gegeben da von Christes geburt ergangen waren Drewzehenhundert Jar, dar nach jn dem Sehzehendem jar an vnser vrawen tach. als sy geborn wart.

Source Fulltext: RAAB, Seitenstetten (=FRA II/33, Wien 1870) S. 161