Ich Elleyz, hern Cholmanns witib von Stein dem Gotgenaede, vergich an diesem prief, vnd tvn chvnt allen den, die in sehent, oder hornt lesen, Daz ich mit wol verdochtem mvet, vnd noch meiner pesten frevnt rat, vnd auch meiner chinde, zv den Zeiten, do ich iz wol getvn mocht, verchauffet han den weingarten datz der weizzenchirchen. in der wachawe, der da||
leit auf der predra, der mein Enickel Katherin hat an gehort, vnd han avch im den wider leit, mit anderm aigen, daz im alz nvtz vud guet ist, auch noch vnser pesten frevnt rat. Nv han ich den vorgenanten weingarten ze chauffen geben recht vnd redleich, dem Erwern mann hern Dietrich von ybs, vnd seiner hausvrowen, vrow Katherein, vnd irn erben, vmb hvndert,||
phvnt, vnd vmb zweinzich phvnt pheninge winner mvinz, der sev mich gar vnd gaentzlich verricht habent, vnd han in den vorgenanten weingarten auf geben, vnd bestaeticht ledichlich vnd vnverchvmbert, mit dreier perchmaister hant, die hie benant sind, Chvnratz, der da sitzet auf dez asperger lehen, dem geit ze purchrecht dreizich pheninge, vnd Hainrichs dez winder, dem man geit sechs, vnd Reinprechtz auf der purge, dem man geit siben phenninge, vnd han auch ich vnd mein svn Johanns, in mit vnsern trewen gelobt, den vorgenanten weingarten zescherm fuer alle ansprach, alz lange daz die vorgenant Katherei mein Enickel zv irn jarn chvmt, dazz si in den vorgenanten chauffe recht vnd redlich auch bestaetigen mach, alz purchrechtz recht ist in osterrich. vnd zv einer pezzern sicherheit han ich vnd mein svn Johanns gepeten, vnsern lieben frevnt hern Jacoben den Eytzendorfer, datz der zv sampt vns in gelobt hat, den vorgenanten scherm zelaisten, wo wier dez nicht entaeten, swi getanen schaden dez naeme der vorgenant her Dietrich oder sein erben, den schulle wier in abe legen, vnd schullent auch daz haben auf vns vnverscheidenlich, vnd auf alle dev vnd wier haben in dem lande ze osterrich. Ist aber, daz der vorgenant her Dietrich, oder sein erben ieder zeit den vorgenanten weingarten verchauffent, dem selben der in chauffet, dem schulle wier in scherm, alz gaentzlich, alz in selben, mit allem dem gelueb, alz vorverschriben ist. Daz die red staet beleib, vnd vnverchert, dor vber geit der vorgenant Johanns mein svn disen prief, versigelt mit seinem Insigel, wann ich selben nicht Insigels han gehabt, vnd der vorgenant her Jacob, mit seinem Insigel, zv einem vrchvnde, vud zv einem zevge diser sach. Der prief ist geben, do von Christes gepurt worn ergangen, Tausent jar, drev hvndert jar, dor noch in dem achzehentem jar, an dem Percht tage, ze Stein in der Stat.

Source Fulltext: RAAB, Seitenstetten (=FRA II/33, Wien 1870) S. 162-163