Reuerendo in Christo patri ac Domino. Reuerendissimo Domino Engelschalco, venerabili abbati totique conuentui Ecclesie Glvnicensis. Gundacherus. diuina prouidencia abbas totusque conuentus in Sytansteten. cum deuotis orationibus, salutem in omnium saluatore. Vt virtus karitatis. que in regno vite est premium defunctorum. in valle miserie solacium sit viuorum. mutuis accendi debet exercitiis spiritualium studiorum, Quapropter horum bonorum honorabilium Studium intendentes. et societatem irreprehensibilem. imo sanctam inter uestram et nostram Ecclesias contrahere indissolubiliter cupientes, per quam potissime animarum saluti prospicitur, et commodo corporis salubrius prouidetur. fedus amicicie et concordie spiritualis que communi et religioso uocabulo fraternitas appellatur. contrahimus et inimus. de vnamini fratrum nostrorum consilio et consensu. ac contractum de presenti. hijs conditionibus additis. more solito confirmamus Vt scilicet quocies nobis alicuius fratrum vestrorum fuerit obitus intimatus proxima feria subsequente compulsatis campanis pro eiusdem anime requie. celebretur publice generale Officium defunctorum, in vigilijs pariter et in missis. et quilibet sacerdotum tres specialiter dicat missas. et inferiores tres quinquagenas. Illitterati cum quinquaginta Aue Maria, totidem pater noster. quilibet premissorum tres insuper corporales suscipiens disciplinas. Preterea singulis annis pro defunctis omnibus fratribus, tam in vestra quam in nostra Ecclesia post festum sci. Bartholomej proxima vacante feria plenum Officium mortuorum in conuentu publice celebretur. et quilibet Litteratorum priuatim addat Placebo. Ceteri dicant cum Aue Maria septies pater noster. Ceterum, si quando aliquem uestrum de licencia sui Abbatis ad Monasterium nostrum transire contigerit, sicut unus nostre congregacionis in omnibus. quam diu licuerit. habeatur. Si vero absque licencia, quod absit, indignacionem sui fugerit Abbatis. usque ad triginta dies tantum. in quibus pro reformacione talis fratris tractabitur, quo cicius potuerit id impleri. litteris renunciis humaniter colligatur. Verum ne abyssus tam salutiferum absorbeat bonum pacis. has litteras, de hijs factas, ratas et gratas habentes in testimonium vobis damus. et sigillorum nostrorum munimine roboratas. Scriptum et datum Anno ab incarnacione domini fluxo M°. CCC°. XIX°. in Vigilia sci. Laurencij martiris.

Source Fulltext: RAAB, Seitenstetten (=FRA II/33, Wien 1870) S. 167-169