Ich Ott vom Stain vergich offenwar an disem brief vnd tun chunt allen den. die in sehent oder horent lesen. daz ich mit verdochtem mut. vnd mit guetem rat meim herren apt Gvndachern von Seytensteten, vnd seinem Gotzhaus, mein lehen auf der zokelsaw. daz mitter lehen verchoft han. daz mein vnd meiner erben rechtz lehen vom Gotzhaus gebesen||
ist. Daz han ich im und seinem Gotzhaus, mit meiner erben gutlichem willen verchoft, mit alle, vnd der zv gehort, zeholcz vnd zevelde. vmb fumf zehen phunt phenning. never winner||
phenning. da er mir dasselb lehen wol mit vergolten hat. vnd da ich meinn vnd meiner erben frum wol mit gefurdert han. der er mich gancz vnd gar gewert hat. vnd dar vber lob ich||
im vnd seinem Goteshaus mit meinen treuwen. ob im iemen her noch an dem vorgenant lehen dehainn chrieg. oder dehain vnrecht tun wolt. den sol ich vnd mein erben im vnd dem||
Gotzhaus an allen seinen schaden aus richten vnd aus pringen. vnd schullen auch desselben lehen des Gotzhaus gewer sein. als lantz recht ist. daz der gewerft vnd daz gelub stet vnd vnzeprochhen beleib, gib ich meim herren apt Gvndachern von Seitensteten, vnd seinem Gotzhaus disen brief ze einem ebigen vrchunt. bestetiget vnd geuestent mit meim anhangvnten Insigel. vnd sint des gezeug. her lybhart der Prior, her albrecht der pharrer von Gresten. her heinreich der pharre von holnstain. Ott der prehauen. albrecht von randek. chunrat von chuching. Michhel von Mense. Dietreich der zechmaister. Ott von eis. vnd ist daz geschehen, da von christes geburt ergangen sint tausent iar und drev hundert iar. dor nach in dem neunzehenten iar an sant Symons tag.

Source Fulltext: RAAB, Seitenstetten (=FRA II/33, Wien 1870) S. 169