Ich vlreich der Piberpeich, vnd mein havsvrow vrow Alhaide, vnd mein sun Alram, fridreich. Seifrid Heinreich. di Haesib von Aichpuhel veriehen offenwar an disem prief vnd tuen chunt. allen den. di in sehent oder horent lesen, di nv sint oder her nach chuftig werdent. Daz wir mit wol verdachtem muet, vnd nach vnsern pesten vreunt rat. vnd auch mit aller vnser erben guetleichen willen. ein lehen, daz da haizzet datz Flaetschenstain in Alhartzperger pharre. daz vnser rechtz aigen gewesen ist. Dem ersam herren Apt Otachern datz Seidnsteten vnd seinem Goteshavs ledigleich an allen chrieg vor rechtz aigen verchauft haben. vmb Neuntzehen phunt pheninge wienner muenzz. der wir auch gantz vnd gar gewert sein. mit alle dem reht. als wir vn vnser vor vordern gehabt haben. vnd mit alle dem. daz czv dem selben lehen gehort, besucht vnd vnbesucht, zv velde vnd czv holtz. mit solicher beschaidenheit. ob dem vor genanten heren vnd seinem Goteshavs. vmb daz vor genant lehen iemant dhain chrieg oder dhain ansprach auf taet, den schulle wir im vnd seinem Goteshavs an allen seinen schaden avs richten. Naem auer er vnd sein Goteshaus des dhain schaden. den schol er haben auf alle dem. daz wir haben in dem Lande. Daz di red staet vn vntzebrochen beleib. geb wir in disen Prief zv einem ebigen vrchund. bestaetigten mit hern Rugers von czauch. vn mit hern Marchartz des Luesnicher. vnd mit Hainreichs des Schenchen von dobra anhangunden Insigeln. Wand wir vnser aigeris jnsigel niht haben gehabt. Des sint gezeug. Her Alram von Reikesdorf. Her. Walther von Meilestorf. Her vlreich der Pauzz. Alram von wasen. vnd sein Pruder der Hainreich. Otacher von Glaeuzz. Leutwein der Neunberger, vnd ander pider leut genueg. Daz ist geschehen, vn der Prief ist gegeben datz Seidnstete. Do von Christes gepuert ergangen warn. Tausent jar vn drevhundert jar. dar nach in dem achtvndzwainczigisten Jar. an Sande Margareten Tag.

Source Fulltext: RAAB, Seitenstetten (=FRA II/33, Wien 1870) S. 183