Wir Albrecht von Gots gnaden Pischoff ze pazzaw. veriehen offenleich mit dem prief. vnd tuen chunt allen den. di in sehent oder hoerent lesen. Daz vns di ersamen vnd geistleichen leut. abt Dietreich ze Seydensteten vnd der Conuent da selben. di trew vnd lieb erczaigt habent. daz si vns gewunnen habent di guet in der obern Prochnikch. di Dietreich von Glouzz von vns vnd vnserm Gotshaus zelehen het. di wir von dem selben Dietreichen gechauft heten vnserm Gotshous, vmb czwai hundert pfunt. vnd vmb czwainczg pfunt pfenning wiennaer vnd wand wir der selben pfenning nicht gehaben mochten. satzten wir di selben guet Chunraten. di weil Purgrafen ze Sousenekk. Also, daz si sich im veruallen hieten vmb di selben pfenning auf den Percht tag. der schuerst chumpt. Nu habent vns der vorgenant abt vnd Conuent ze Seydenst. di vor geschribenn tzwai hundert pfunt vnd czwainczg pfunt pfenning gewunnen. vnd haben wir in di selben guet ze chauffen gewen. für di selben pfenning. mit vnsers Capitels gutem willen vnd gunst. mit allen den rechten vnd nutzen. di dar zv gehoerent. ze veld. ze holtz. cze dorff. versuecht vnd vnuersuecht. gestift vnd vngestift. wie iz genant ist. als si der vor genant. Dietr. von Glouzz inne hat gehabt. vnd als wir si selb inn gehabt scholten haben. Si habent auch vns noch mer guet vnd trewn erczaigt. Swann wir di selben guet. wir oder vnser nachchomen von in wider chauffen wellen. vmb di oft genanten pfenning. des schullen si vns stat tuen. welich tzeit daz ist in dem iar. Waer auch, daz wir oder vnser nachchomen dem vor genanten abt vnd dem Conuent dhainn gewalt oder vnrecht tuen wolten an den selben gueten. des schol der hochwirdig herr der Pischoff von Saltzburkch. ir scherm sein. mit vnserm gueten willen. also daz er in geholfen schol sein. daz in wider uar. alles. daz obgeschriben ist. an alles geuaer. Wir sein auch des selben chauffes des vor geschribenn Abts vnd Conuents rechter herr vnd scherm für all ansprach. wo in des not geschiecht. Ez schol auch vnser Capitel des selben scherms vnentgolten sein. an dem guet. daz si sunderleich an gehoert. Vnd dar vber cze vrchund geben wir dem abt vnd dem Conuent disen prief. versigelt mit vnserm vnd vnsers Capitels an hangunden jnsigeln. Des sind getzeug. Maister Andre vnser obrister Schreiber. Maister Ruedmar vnser vitztum. Maister Larentz vnser chorherr. Ortlieb czaendel vnser hofmaister. vnd anderr erbaerr leut genueg. Der prief ist gegewen tze Pazzaw. am Suntag vor dem Percht tag. Noch Christes gepurd. Dreutzehen hundert iar. in dem vier vnd dreiskistem jar.

Source Fulltext: RAAB, Seitenstetten (=FRA II/33, Wien 1870) S. 192-193