Benedictus episcopus. seruus seruorum dei. Dilecto filio . . . Abbati Monasterij in Seydensteten ordinis sancti Benedicti Patauien. dioc. Salutem et apostolicam benedictionem. Exhibita nobis tua petitio continebat, quod nonnulli Monasterij tui Monachi et Conuersi pro uiolenta iniectione manuum in seipsos, et quidam pro detentione proprij. alij etiam pro denegata tibi et predecessoribus tuis obedientia seu conspirationis offensa. excommunicationis. laqueum incurrerunt, quorum Monachorum quidam diuina celebrarunt offcia, et receperunt ordines sic ligati. Quare super hijs eorum prouideri saluti a nobis humiliter postulasti. de tua itaque circumspectione plenam in domino fiduciam obtinentes. discretioni tue auctoritate presentium concedimus. ut eosdem excommunicatos hac uice absoluas ab huiusmodi excommunicationum sententijs iuxta formam ecclesie uice nostra, iniungens. quod de iure fuerit iniungendum. Prouiso ut manuum iniectores. quorum fuerit grauis et enormis excessus, mittas ad sedem apostolicam absoluendos. Cum illis autem ex eisdem Monachis qui facti immemores vel iuris ignari. absolutionis beneficio non obtento, receperunt ordines sic ligati et diuina officia celebrarunt, iniuncta eis pro modo culpe penitentia competenti, eaque peracta, liceat tibi de misericordia. que superexaltat iudicio. prout eorum saluti expedire uideris, dispensare. Si uero prefati Monachi excommunicati, scienter. non tamen in contemptum clauium, talia presumpserunt, eis per binnium ab ordinum executione suspensis et imposita eis penitentia salutari, eos postmodum si fuerint bone conuersationis et uite. ad gratiam dispensationis admittas. Proprium autem si quod habent dicti Monachi et Conuersi in tuis facias manibus resignari, in utilitatem dicti Monasterij conuertendum. Datum Auinione X. kl. Martij. Pontificatus nostri Anno Primo.

Source Fulltext: RAAB, Seitenstetten (=FRA II/33, Wien 1870) S. 194-195