Ich Dietreich von Reichgersdorf vnd ich Margret sein housurouwe vnd vnser paider erben, veriehen offenleich mit dem prief vnd tun chunt allen den, die in sehent oder hoerent lesen, Daz wir mit woluerdahtem mut vnd mit gutleichem willen nach vnserr pesten frevnt rat, czder czeit, do wir ez wol getun mohten, den ernwirdigen geistlichen herren, Abt Ekfriden, vnd dem Conuent des Gotshous cze (Sei) densteten, cze chouffen haben geben vnser gut am Pruklein, do Chunrat auf gesezzen ist, daz wir (von) dem vorgenanten herren Abt Ekfriden vnd von seinem Gotshous cze rehtem lehen gehabt haben, (daz) gelegen ist in aspechaer pfarr mit allen den nutzen vnd rehten, die dar czu gehorent cze holtz, cze (velt). besueht vnd vnbesueht, vmb siben pfunt pfenning vnd vmb sehtzich pfenning wiennaer mvnze (der) sy vns gancz (gew) ert habent, Mit solher ouz genomener red, daz wir. (vnd all) vnser erben vnd nachchomen, dez vorgenanten guts am pruklein der eg (enanten herren abt Ekfrides, vnd seiner nachchomen vnd des Gotshous cze Seidensteten scherm vnd gweren schullen (sein) an aller stat, wo in des not vnd durft geschiht mit reht, als reht lehens reht ist in dem land cze Oesterreich. Taeten wir des niht, swelhen schaden des der vorgenant her abt Ekfrid oder sein nachchomen vnd daz Gotshous cze Seidensteten naemen, den ainer oder czwen ouz dem Conuent gesagen mohten, pey irr gwizzen, den schullen sy mit samt dem houptgut haben auf vns vnd auf allen vnsern erben vnd nachchomen vnd auf aller der hab, die wir haben in dem land cze Oesterreich, vnd schûllen ouch houptguts vnd Schadens do von bechomen, swo sy naehst mugen, auf wazzer vnd auf land, an alle chlag vnd furbot, in swelhem lantgeriht daz ist, mit vnserm gutleichem willen, Daz in daz allez staet vnd vntzebrochen beleib von vns, dar vber geben wir dem vorgenanten herren Abt Ekfriden vnd seinen nach chomen vnd dem Gotshous cze Seidensteten den prief czu ainem sihtigen vrchunde vnd czu ainem waren getzevgen der vorgeschriben sache, versigelten mit meinem vorgenanten Ditreichs von Reichgersdorf anhangundem jnsigel vnd mit Vlreichs von Schiltdorf meins prueder anhangundem jnsigel, der durch besunderr pet willen czu getzeugen der egeschriben sache sein jnsigel an den prief hat gehangen. Daz ist geschehen vnd der prief geben cze Seidensteten, do man von Christes gepurde czalt Drevtzehen hundert iar. darnoch in dem acht vnd viertzgisten iar an sand Martins tag.

Source Fulltext: RAAB, Seitenstetten (=FRA II/33, Wien 1870) S. 227-228