Ich Jans von czelking vnd mit mir alle meinev geswistreid vnd all vnser erben veriehen mit dem prief, Vnd ich Minczla hern Albrechtz witib von czelking dem got genad vargich auch an den prief mit samt meinen chindern vnd tun chunt allen den, die in sehent oder hoerent lesen. Daz wir von dem erbirdigen herren Abt Ekfriden datz Seydnsteten vnd von seinem Conuent da selben gehabt ainen Pawhof, der gelegen ist vnder dem Hous dacz czelking, do wir dem abbt ze Seydensteten vnd seinem Gotzhaus all iar von gedient haben drey schilling wiennar pfenning vnd auch etleich Routakcher, die her nach mit namen an dem prief geschriben stent mit dem dienst der dar auf gelegen ist, den wir auch dem abbt ze Seydensteten vnd seinem Gotzhaus alle iar da von gedient haben. Daz erst haizzet daz grozz rout vndern weingarten vnd dient dreizzig wiennaer pfenning. Dar nach Seidleins Rout im winchel, daz dient aecht wienner pfenning. Do pei daz santig rout segs pfenning. Daz Rout im pfaffenwinchel dient acht pfenning. Vnd spitzet rout dient fumf pfenning. Ain rout haizzet der wegchs dient acht pfenning. Drev rout in dem Aersgraben diennt neunczehen pfenning. Ain rout neben dem hard, dient dritthalben pfenning. Drev router ligent im Bolfstal. die diennt achttzehen pfenning. Dar noch in dem obern veld gegen ainsidel ligent drev router vor dem haselgraben, die diennt achttzehen pfenning. Daz gespitzet rout dient segs pfenning. Vnd daz dar nach leit, dient czwelif pfenning. Daz lang rout var dem hochholcz dient czwelf pfenning. Vnd daz rout an dem portz dient segs pfenning. Des vorgenanten diensts auf dem ee genanten Pawhof vnder dem hous dacz tzelking vnd auf den vor geschribenn Routaekchern habent vns die eˆ genanten herren Abt Ekfrid cze Seydensteten vnd sein Conuent gancz vnd gar ledig lazzen Also, Daz wir in da von furbaz dhainen dienst schullen gewen. Wir schullen awer ich Jans von czelking vnd meinev geswistreid. vnd vnser erben, oder swer den Pawhof vnder dem hous dacz czelking vnd die ee genanten Routakcher inne hat, di selben guter cze rehtem lehen nemen. von dem vor genanten herren Abt Ekfriden vnd von seinen nachchomen vnd dem Conuent des Gotshous ze Seydensteten zv einem staeten gegenwegsel ledichleich gegewen vnd auch gewen vnser vreies aygen, daz gelegen ist pey den czwain hoefen dacz (Pruel) vnd haizzet daz weinczurel lehen, do Hainrich der weinczurl auf sitzet. do man von alle iar dient ain pfunt wiennaer pfenning vnd czehen wienner pfenning. An sand Georgen tag fumf vnd ain halbs pfunt wiennar pfenning. vnd an sand Michels tag fumf vnd ain halbs pfunt wienner pfenning. mit allen den nutzen vnd rehten, die dar czv gehoerent. cze holtz, cze uelt, besucht und vnbesucht. als wir daz selben inne haben gehabt. Wir schullen auch des vorgeschribenn aigens der vor genanten herren Abt Ekfrides vnd seiner nachchomen vnd seines Conuentes des Gotshous ze Seydensteten scherm vnd gwer sein an aller stat, swo in des not geschiecht, als aigens recht ist in dem land ze Osterreich. Taeten wir des nicht, swelichen schaden des die ee genanten herren Abt Ekfrid vnd sein nachchomen vnd der Conuent dacz Seydensteten naemen mit ainem rechten, den ainer oder czwen auz dem Conuent gesagen moechten pei irr gewizzen, den schullen wir in ablegen. Vnd schullen auch des bechomen datz vns vnd datz aller der hab, di wir haben auf wazzer vnd auf land in dem land ze Oesterreich. an allev chlag vnd furbot mit vnserm gutleichem willen. Daz daz alles staet vnd vntzebrochen beleib von vns. Dar vber gewen wir||
den vorgenanten Abt Ekfriden vnd seinen nachchomen vnd dem Conuent des Gotshous ze Seydensteten den prief czu ainem sichtigen vrchund vnd czv ainem waren geczeug der vorgeschribenn sache, versigelten mit meinem vor genanten Jansens von czelking anhangundem jnsigel, Vnd mit hern Ottens von czelking meins vetern vnd mit Vrschalichs (?) von Maeczlaesdorf. ze den czeiten Pur (gra) fen cze czelking anhangunden Insigeln, die zv geczevgen der vor geschriben sach irev insigel an den prief habent gehangen. Daz ist geschehen vnd der prief gegewen datz Seydensteten, Do man von Christes gepurd czalt Dreutzehen hundert iar dar nach in dem Noun vnd Vierczgesten iar. an sand Veits tag.

Source Fulltext: RAAB, Seitenstetten (=FRA II/33, Wien 1870) S. 229-230