Ich Jans Pauzz vnd ich Anna sein housuvouwe vnd alle vnser erben wir veriehen offenleich mit dem prief vnd tun chunt allen den, die in sehent oder horent lesen, Daz wir mit woluerdahtem mut vnd mit gutleichem willen, nach vnserr pesten freunt rat zder czeit, do wirz wol getun mohten, dem erwirdigen herren Abt Ekfriden vnd seinem Conuentt des Gotshous cze Seidensteten cze chouffen haben geben auf ir oblay vnser gut datz dem Peltz vnderm schachen, daz gelegen ist in sand Peter pfarr, daz rehtez freyz aigen ist, mit allen den nutzen vnd rehten, die dar czu gehorent, ze holtz, cze uelt, besueht vnd vnbesueht, vmb ainlef pfunt wiennaer pfenning, der sy vns gantz vnd gar verriht vnd gewert habent. Wir schullen ouch, ich vorgenanter Jans der Pauzz vnd ich Anna sein housurouwe vnd alle vnser erben vnd nachchomen des vorgeschriben guets der eˆgenanten herren, Abt Ekfrides, vnd des Conuents des Gotshous cze Seidensteten, scherm vnd gweren sein fur alle ansprach, an aller stat, wo in des not geschiht, als freys aigens reht ist, in dem Land cze Oesterreich Geschache des niht von vns, swelhen schaden des der vorgenant herr Abt Ekfrid, oder sein nachchomen, vnd der Conuent des Gotshous cze Seidensteten naemen, den ainer oder czwen ouz dem Conuentt gesagen mohten pey irr gewizzen, den schullen wir in ablegen an alle ir mue, Vnd schullen ouch des bechomen datz vns vnd datz aller der hab, die wir haben in dem land cze Oosterreich, als sy naehst mugen, auf wazzer vnd auf land, an alle chlag und furbot, in welhem Lantgeriht daz ist, mit vnserm gutleichem willen. Daz in daz allez staet vnd vntzebrochen beleib von vns. Dar vber geben wir dem vorgenanten herren Abt Ekfriden vnd seinen nachchomen vnd dem Conuent des Gotshous cze Seidensteten den offen prief czu ainem sihtigen vrchunde vnd czu ainem waren getzeugen der vorgeschriben sache, versigelten mit meinem vorgenanten Jansen des pauzzen anhangundem Insigel, vnd mit Otten des pauzzen meins vetern, vnd mit Purcharts des Nevnwergaer meins Ohaim anhangunden Insigeln, die czu getzeugen der vorgeschriben sache irev insigel an den prief habent gehangen Daz ist geschehen, vnd der prief geben datz Seidensteten, do man von Christes gepurde czalt Drevtzehen hundert jar, dar noch in dem Nevn. vnd Viertzgisten iar. an Sand Bartholomes tag.

Source Fulltext: RAAB, Seitenstetten (=FRA II/33, Wien 1870) S. 231-232