Ich Ott von Zintzndorff vergich mit dem offenn prief vnd tun chunt alln den leutn, di in sehnt oder hornt lesn, daz ich mit wolbedachtm mut vnd mit guetem rat vnd willn czu der czeit, do ich ez wol getun mochtt, den erbern herrn vnd fursten apt Englschalchn cze Seydensteten vnd sein gnants Gotshavs daselbs gancz vnd gar ledig sage vnd lazze aller der ansproch, die ich ...... han auf seiner guter ains, des Schoephls lehn auf dem Graentleinsperg gnant in Groestner pharr gelegn, also, daz ich vnd alle mein erbn furbaz dhain ansprach dar vmb habn welln noch schulln in dhainn wegn, weder wenig noch vil. Vnd dar vmb czu eine steten vrchund gib ich dem vorgnantn Apt Englchalchn vnd seim wirdign Gotshaws cze Seydenstet den prief, versigelt mit meim des egnantn Ottn von Czintzndorff, vnd mit hern Dytrichs des Schenchn von Dobra anhangunden Insigeln, der das durch meinn willn cze gezeug der obgeschribn sach an den prief hat gehang. Das ist geschehn vnd der prief ist gebn nach Christs gepurd vber Drewtzehn hundert Jar, dar nach im Sibn vnd fumftzgisten Jar, am Eritag in den Phingstveyrtagn.

Source Fulltext: RAAB, Seitenstetten (=FRA II/33, Wien 1870) S. 235-236